Çalakîyanê wendekaranê lîseyan ê ke Fransa de dewam kenê de, 400 lîse ameyî girewtiş û zêdeyêrê 2 hezar kesî ameyî destbendkerdiş.
Protestoyê wendekaranê lîseyan ê Fransa, ke vera şert û mercanê perwerdeyî û kêmkerdena butçeyî ameyê organîzekerdiş, seraserê welatî de vila bîyî. Xeylî herêman de mabenê wendekaran û polîsan de pêkewtişî vejîyayê.
Wezîrê Edaletî yê Fransa Gerald Darmaninî eşkera kerd ke destpêkê protestoyan ra zêdeyêrê 2 hezar kesî, ke zafêrîyê înan ciwan ê, ameyî destbendkerdiş. Parîs û sewbîna şaristananê sey Strasbourg, Marsîlya û Rennes, wextê çalakîyanê ke ameyî viraştiş de, polîs û wendekarî ameyê duştê yewbînan.
Strasbourg de polîsan gazê îsotî şuxulna, la Marsîlya de hetê wendekaran ra fîşekê hewayî ver bi refanê polîsan ameyî eştiş. Rennes de zî konteynerê çopî ameyî veşnayîş.
Parîs de çalakîkerdoxan pankartê bi nuştişê “Ma wazenê ameyoxê xo awan bikerê, ma nêwazenê tehemul bikerê” berz kerd. Çalakîyan de sloganê sey “Perwerde îmtîyaz nîyo, heq o” zî ame şuxulnayîş.
400 lîse ameyî girewtiş
Wezîrê Perwerdeyî yê Fransa Edouard Geffrayî roja îne eşkera kerd ke seraserê welatî de nêzdîyê 400 lîseyî ameyî girewtiş.
