Torra Têkoşînê Vera Şîdetî ya Amedî dîyar kerd ke do 6ê teşrîna verêne ra pey her sêşemeyî verê edlîye de “Nobeta Cinî, Edalet û Vîrî” dest pê bikera, seba ke bale biancîya qirkerdiş û merdişê cinîyan ê şikdaran ser o. Nobete do 10 hewteyî dewam bikera.
Torra Têkoşînê Vera Şîdetî ya Amedî eşkera kerd ke do vera qirkerdiş û merdişê cinîyan ê şikdaran “Nobeta Cinî, Edalet û Vîrî” dest pê bikera.
Eşkerayî Komeleya Cinîyan a Rosa de ameye dayene. Ame dîyarkerdene ke nobete do 6ê teşrîna verêne ya 2026î roja sêşemeyî seat 12.30 de verê Edlîyeyê Amedî de dest pê bikera û 10 hewteyî her sêşeme eynî ca de dewam bikera.
Bi nameyê cinîyan, endama Merkezê Heqanê Cinîyan ê Baroyê Amedî Îrem Îlhane qisey kerd. Aye vat ke tayê rewşan de merdişê cinîyan sey “xokiştiş”, “qeza” yan “merdişo şikdar” yenê nîşankerdene û bi tesîr nêyenê tehqîqkerdene. Îlhane dîyar kerd ke ganî qirkerdişê cinîyan sey hadîseyanê şexsîyan nêrê girewtene; şîdetê zereyê keyeyî, tehdît, taqîbkerdişo bi israr, resayîşê çekan, tatbîqnêbîyayîşê qerarê pawitişî, tehqîqato bêtesîr û bêcezayî ganî pîya bêrê erjnayene.
Ganî merdişê şikdarî bi tesîr bêrê tehqîqkerdene
Torre waşt ke bi taybetî rewşan de ke sebebê merdişî eşkera nîyo, cayê hadîseyî, delîlê edlî û dîjîtalî û şîdeto ke cinîyan verê cû dîyo, bi hîrayî bêrê tehqîqkerdene.
Îrem Îlhane vat ke ê vera ney ê ke bajaranê kurdan de tehqîqatê merdiş û vindîbîyayîşê cinîyan merheleya verêne de bi îzahatanê sey “xokiştiş”, “kewtiş”, “xeniqîyayîş” yan “vindîbîyayîş” sînordar benê.
Torre vengdayîşê ney zî kerd ke Qanûnê Hûmare 6284 yê pawitişê cinîyan bi tesîr bêro tatbîqkerdene, rewşanê xeternakan de tedbîrê pawitişî bêrê girewtene, îhmalê karmendanê pêroyîyan bi xoserî bêrê tehqîqkerdene û dosyayan de ke faîlî karmendê pêroyî yê, xoserîya tehqîqatî bêra garantîkerdene.
Her hewte do hîkayeyê cinîyan bêrê vatene
Ame dîyarkerdene ke çarçewaya nobete de her hewte do cuya cinîyanê kiştîyan û persê bêcewabî yê dewayanê înan bêrê ardene rojeve.
Îlhane vat ke nobete tena seba cezakerdişê faîlan nîya; amancê aye no yo ke dezgehê ke pawitişê cinîyan de berpirsîyar ê û karmendê ke tehqîqato bitesîr nêramito, hesab bidê.
Torra Têkoşînê Vera Şîdetî ya Amedî venga rêxistinanê cinîyan, rêxistinanê huqûq û heqanê merdiman, dezgehanê demokratîkan û hemwelatîyan da ke beşdarê nobete bibê ke 6ê teşrîna verêne de do dest pê bikera.
