Endamê Konseya Îcrayî ya KCKyî Xebat Andokî vat ke nêzdîbîyayîşê dewleta tirkan ê problemê kurdan zaf teng o: “Problemêko seserre est o. Eke dewlete bi sebeban ney, tena bi netîceyan eleqedar bibo, problemi çareser nêkena.”
Xebat Andokî bernameyêkê Stêrk TVyî de derheqê Prosesê Haştîye û Komelê Demokratîkî, qanûnê çarçewe û problemanê komelkî û leşkerîyan de nirxnayîşê xo ardî ziwan.
Andokî vat ke proses zaf giran aver şino û sebebê ci îqtîdarê AKPyî û dewleta tirkan o: “Dewlete prosesî sey ‘Tirkîyaya bêterore’ name kena û her çî tena çarçewaya emnîyet û çekverdayîşî de gêna xo dest. Ma stratejîya xo vurnaye, çekî veşnayî û gerîlayî Vakurê Kurdîstanî ra antî peyser. Ma her çîyo ke kewtbî ma ser, kerd; la dewlete fehmê xo de vurîyayîş nêkerdo.”
Andokî dîyar kerd ke komîsyon û heyetî ameyî awankerdene, la raya pêroyî nêzana ke kam tede yo û wezîfeyê înan çi yo: “Kesêk nêşeno nê prosesi bê Rayber Apo biramo. Eke Rayber Apo rojnameger, sîyasetmedar, akademîsyen û rêxistina xo reyde têkilî nêrono, proses çitur do bireso serkewtişî? Girêya esasîye statu û şertê xebate yê Rayberî yê.”
Andokî bale ante hêzanê mîyanneteweyîyan ser o û vat ke ê wazenê proses nêzelal bo û giran aver şêro: “Hêzê mîyanneteweyî berpirsîyarê problemê kurdan ê. Seba ke çîyê ke şarê kurdan, şaranê herême û heta dewletanê herême rê zerar danê, nêvejîyê, ganî dewleta tirkan bi bawerîyêka hîna zafe nêzdîyê na meseleye bibo.” Andokî waşt ke proses hîna zaf komelkî bibo û vat ke Rayberîye muzakerekar o, la ganî barê têkoşînî heme kes pîya bigîro xo ser.
Andokî derheqê krîzanê Tirkîya de vat ke dewlete mîyanê xo de pûç bîya û nê krîzî bi problemê kurdan û demokratîkbîyayîşî ra girêdayî yê. Andokî rayîrşîyayîşê camêrdan ê vera şîdetê vera cinîyan ê Amedî zî sey çalakîyêka xorexnekerdişî erjnaye: “Ganî her camêrd vera cinî hertim xorexnekerdox bo; camêrdîya mewcûde ganî bivurîyo.”
