Wekîlê Hatayî Can Atalay, ke zîndan de tewqîfkerde yo, îlan kerd ke 1ê teşrîna verêne de,roja ke Meclîsê Pîlê Mîletê Tirkîya (TBMM) dest bi serra xo ya qanûndayîşî ya newîye kena, dest bi grevê veşanîye yê 24 seetan kerd. Atalay vat ke çalakîya ey seba heqê temsîlê Hatayî, caardişê qeraranê Mehkemeya Bingeyêne (AYM) û wedaritişê astenganê ke ver bi wezîfeyê wekîltîye yê ey de est ê, yena kerdene.
Wekîlê Partîya Karkeranê Tirkîya (TÎP) yê Hatayî Can Atalay, ke bi qerarê AYM ra pey zî hema zîndan de yo, roja ke TBMM dest bi serra xo ya newîye kerde, bi yew deklarasyonî ilan kerd ke dest bi grevê veşanîye yê 24 seetan kerdo.
Atalay deklarasyonê xo de bale ante ser weçînîyayoxan, sîyasetkaran, rojnamegeran û hunermendan ke zîndanan de yenê tepiştene, û vat ke verê nê çiyan de bêveng nêmaneno.
‘Ez wezîfeyê xo ra fek vera nêdana’
Atalay vat: “Şarê Hatayî ez weçînaya ke ez namê ey ra qisey bikerî û hesab biperskerî. Ez nê wezîfeyî ra fek veranêdana.” Ey nîya zî vat: “Nika kardî resa esteyî.”
Hesabê medyaya dîjîtale yê Can Atalayî ra nê çekuyî ameyî nuştene:
“Welatîyanê delalî, sey mi seyan weçînîyayoxî, sîyasetkarî, rojnamegerî û hunermendî tena sebebê helwesta xo ya sîyasîye ra, bêheqî û bêhuqûqî zîndanan de yenê tepiştene. Ma ra yeno waştene ke ma her çî qebul bikerê, çiyo ke qewimîyo sey bextreşîye bivînê û bêveng bimanê.
Ez bêveng nêmanena
Şarê Hatayî ez weçînaya ke ez namê ey ra qisey bikerî û hesab biperskerî. Ez nê wezîfeyî ra fek veranêdana. Nika kardî resa esteyî.
Ewro, roja ke Meclîs abîyeno, seba ke heqê temsîlê şarê Hatayî yo ke ‘gasp bîyo’ û vengê karkeran, feqîran, heme şarê ma û înanê ke adaletî rê veşan ê, ke nêyeno eşnawitene, bido eşnawitene, ez dest bi grevê veşanîye yê 24 seetan kena. No hem zî yew vengdayîş o: seba ke Qanûnê Bingeyênî rê bêro tewr kerdene, qerarê Mehkemeya Bingeyêne bêrê ca û astengê ver bi wezîfeyê mi de bêro wedaritene. Ez her kesê ke problemanê welatî sey problemê xo vîneno, vengdana ke vengê xo berz bikero. Ma ra teber kes ma nêxelesneno. Ma heqanê xo, welatê xo û ameyoxê xo pîya qezenc kenê.”
