Pawitox Eren Baskinî o ke pîyê ey Mecît Baskinî serra 1993î de Anqara de amebî kiştiş û faîlî ey nêamebî vînayîş, seba roşnîkerdişê faîlanê pîyê xo muracatê Serekîya Daîreyê Cigêrayîşê Sucanê Kerdoxnedîyaran o ke bin banê Wezîrîya Edeletî de ameyê awankerdiş, kerd.
Pawitox û pawitkarê heqê mordemîye Eren Baskinî, eşkera kerd ke ey seba roşnîkerdişê kiştoxanê pîyê xo Mecît Baskinî o ke 3yê teşrîna verêna 1993î de Anqara de amebî kiştiş, muracatê Serekîya Daîreyê Cigêrayîşê Sucanê Kerdoxnedîyaran ê bin banê Wezîrîya Edeletî de amaye awankerdiş, kerd. Eren Baskinî, seba zelalkerdişê kiştoxanê pîyê xo yew raporo 13 rîpel amade kerdo û dayo zere.
Seba xebatanê hewceyan veng da
Eren Baskinî waşt ke dosyayê cipersayiş û mehkemekerdişî yê derheqê kiştişê pîyê xo de hetê Serekîya Daîreyê Cigêrayîşê Sucanê Kerdoxnedîyaran o ke newa awan bîyo ra bi şiklêko hîra bêro cipêrsayene. Eren Baskinî da zanayîş ke ganî delîlê ke dosyaye de yê, qerarê mehkemeyê ke teqez bîyê, eşkerayîyê temsîlkaranê dewlete û ernayîşê ke bado vejîyê werte pîya bêrê destgirewtiş. Babete newe ra û heme hetan ra bêro cipersayîş, seba ke raştîye vejîyo werte hetê huquqî ra cipersayişêko cidî bêro destpêkerdiş.
Derheqê Mecît Baskinî de
Mecît Baskin o ke 30ê êlûla 1993î de sey Midurê Nifûsî yê Qezaya Altindagî yê Anqara de Wezîfedar bî, dima vejîyayişê karî ra saetanê şewe de ame remnayîş û 3yê teşrîna verêna 1993î de raya Anqara-Haymana ser o ke herêma Golbaşî, kişta banêko wêrankerde de bi çekan amebî kiştiş û laşê ey amebî dîyayîş.
