Colemêrg – Avûkat Eren Baskinî derheqê pîyê xo Abdulmecît Baskinî de, ke 30ê êlule ya 1993î de Ankara de destbendkerdişî de ame kiştene, dîyar kerd ke dewlete şêna di-hîrê rojan de kiştişê pîyê ey eşkera bikera. Eren Baskinî vat: “La nêkena, çunke dewlete kişoxanê ma ra hes kena, coka înan muhakema nêkena.”
Abdulmecît Baskin, ke Ankara de Mudirê Nufûsî yê Qezaya Altindagî bi, 30ê êlule ya 1993î de hetê hêzanê dewlete ra ame destbendkerdene. Cenazeya ey 3yê teşrîna verêne ya 1993î de Golbaşî de, destê ey peyê ey ra girêdaye, ameye dîyene. 2014 de vera sûcdaran, ke tede Mehmet Agar, Îbrahîm Şahîn û Korkut Eken zî bîyî, Dewaya JÎTEM’î ya Ankara ameye akerdene. Dosyaya Abdulmecît Baskinî 30ê êlule ya 2023î de bi behaneyê vîyartişê wextî ameye qefelnayene.
‘Seba kurdîtîye pîyê mi kerd hedef’
Lajê Abdulmecît Baskinî Eren Baskinî vat ke pîyê ey seba xebatanê kurdîtîye ame hedefgirewtene: “Pîyê mi embazanê xo yê sîyasetmedaran reyde Însîyatîfê Netewa Kurdan de bî. Ê Colemêrg, Amed, Ankara û Îstanbul de xebitîyayî. Pîyê mi memûr bî; muhtemelen vatêne ‘Memûrêk çira înan reyde kom beno?’” Eren Baskinî ard vîrî ke îtîrafanê polîsê ekîba taybete Ayhan Çarkinî ra dima dewa ameye akerdene, dima 19 keyeyê ke merdimê înan ameyî kiştene, dewayan pîya kerdî yew.
‘Mehkeme sey şanoyî bi’
Eren Baskinî vat ke nêzdîyê 10 serran ê şîyî û ameyî mehkeme, la mehkeme sey şanoyî bi: “Ma şahîdî ardî, her çî eşkera kerd. Mehkeme vat ‘Heya, nê qatil ê’, la qerarê beraetî da. Îstînafî qerar xirab kerd, la mehkeme reyna ceza nêda. Dewaya pîyê mi ke 1993 de ame kiştene, 2023 de bi vîyartişê wextî kewte.”
Eren Baskinî dîyar kerd ke goreyê Dadgehê Heqanê Merdiman ê Ewropa, eke dewlete tede bo vîyartişê wextî nêameyêne xebitnayene û wina vat: “Ez 10 serrî her hîrê aşman reyê bê vindertiş şîya muhakemakerdişan. Dewlete her çî zanena, her çî qeyd kerdo. Eke biwazê, di-hîrê rojan de şênê heme kişoxan bîyarê ma ver û ceza bidê înan. La nêkenê, çunke dewlete nê kişoxan ra zaf hes kena.”
