Fuarê Kitaban ê Amedî yo 10. roja xo ya 5. de dewam keno. Weşanxaneyê Morî ke seba domanan weşanan keno, fuar de cayê xo girewto û seba domanan setêkê vermektebî yê 8 fasîkulan amade kerdo.
Fuarê Kitaban ê Amedî yo 10. ke hetê DTSO û TUYAP’î ra Merkezê Fuar û Kongreyî yê Mîyanneteweyî yê Mezopotamya de ameye organîzekerdene, roja xo ya 5. de dewam keno. Nê rojan de bi hezaran kesan fuar zîyaret kerd û kitabî herînayî.
Weşanxaneyê Morî tena seba domanan kitabanê perwerdeyî amade keno. Armancê weşanxaneyî no yo ke bi rayîrê kitaban xeyalê domanan aver şêrê û nê materyalî perwerdeyê kurdkî de bêrê xebitnayene.
Seto ke 8 fasîkulan ra virazîyeno, hetê Mem Bawer û Ridvan Polatî ra ame amadekerdene û redaksîyonê ey Servet Denîzî kerdo. Her kitab yew aşme rê yeno xebitnayene. Setî de kultur û folklorê kurdan, rojê taybetî, reng, veng, labîrent, matematîk, xoza û ekolojî û şeklê geometrîkî est ê.
Xebatkara Weşanxaneyê Morî Berîtane Aykût ajansa ma rê qisey kerd û vat ke standê înan rastê eleqeyêko gird yeno: “Nê materyalî goreyê prosesê averşîyayîşê 8 aşman ameyî amadekerdene ke domanî emrê qijî de ziwanê xo yê dayîke bimusê. Keyeyê ke bi serran o kitabanê ma taqîb kenê, wazenê ke domanê înan keye de bi kurdkî qisey bikerê.”
Aykûte dîyar kerd ke berhemê înan Zarokîstanan de yenê xebitnayene û xebatê weşanxaneyî do dewam bikerê: “Armancê ma yo sereke no yo ke tena domanî ney, pîlî zî bi ziwanê dayîke qisey bikerê û kurdkî bimusê. Hêvîya ma na ya ke no eleqe sînordar nêmano, hîna pîl bibo û heme komel bi ziwanê xo biwano û qisey bikero.”
