Namzedê Serekîya Odaya Bazirganî û Sanayî ya Qoserî Sedat Egeyî vat ke o seba vurîyayîş, şefafîye û karê ciwanan bîyo namzed: “Qoser 42 bajaranê Tirkîya ra girdêr o, la sey dewêk mendo. Ma wazenê odaya Bazirganî bikerê odaya şarî.”
Odaya Bazirganî û Sanayî ya Qoserî (TSO) seba weçînayîşê rayberîya xo ya newîye 1ê teşrîna verêne de şina sindoqan. Odaya ke 7 hezar û 113 endamê qeydkerdeyî est ê, 3 hezar û 220 endamî do rey bidê. Serra 1991î ra nata serekîya oda nêvurîyaya. Namzedê Lîsteya Kewe Sedat Egeyî ajansa ma rê qisey kerd.
Sedat Egeyî vat ke ê seba vurîyayîşî, şefafîye û qadroyêka newe namzed bîyî: “Ganî oda de her çî pak û aşkera bo ke komel û endamê ma bizanê çi est o û çi çin o. Ma do seba belgeya faalîyetî û belgeya qeydî kesî ra pere nêgêrê û endaman do bêpere qeyd bikerê. Ma do fîyatê xizmetî yê awankerdişê şîrketan zî bîyarê seviyeya standarde ya Tirkîya.”
Egeyî dîyar kerd ke ê seba serdestîya daîmî namzed nîyê û wina vat: “Sînorê ma yê rayberîye 5 serrî yo. Badê di dewreyan (10 serran) ma do nêbê namzed. Wa ciwanêko bîn bêro û vurîyayîşêko newe bikero; la ma do tecrubeyê xo zî bixebitnê ke paştî bidê înan.”
Egeyî ard ziwan ke nufûsê Qoserî 42 bajaranê Tirkîya ra zêdeyêr o û Bazirganîye de teber ra potansîyelêko gird ê Qoserî est o, la hetê xizmetî ra peyser mendo. Egeyî vat ke ganî vernîya koçkerdiş û bêkarîya ciwanan bêro girewtene: “Ma wazenê sermîyandar û karsazê ma yê ke şîyê teber, peyser biyarê ke ciwananê ma rê îmkanê karî biafernê.”
Egeyî dîyar kerd ke barê şerî giran o û ê haştî û aramîye wazenê: “Eke şert û mercî rind bibê, Bazirganî zî do aver şêro û merdimê ma do peyser bêrê.” Egeyî venga heme endaman da ke roja weçînayîşî şêrê sindoqan û bi wijdanê xo reya xo bidê.
