Fotografkaşe Guneşe Kaplan ke bi xebatanê xo yê vîrê kulturî yê Amedî û herême yena şinasnayene, London de bi pêşangehêk vejîya verê hezkerdoxanê hunerî.
Guneşe Kaplan ke tarîx, mîmarî, kuçe, merdim û hokê kulturî yê Amedî bi rayîrê fotografan belge kena, xebatê xo yê serran London de pêşkêşê seyrkerdoxanê mîyanneteweyîyan kerdî. Xebatanê aye de ke xeta “Dewsê Qedîmî” ser o şekil girewto, Amed cayo sereke gêno; a wazena bînayanê kerrayinan ra heta kuçeyanê bajarî, cuya kulturî ra heta hîkayeyanê rojaneyan ê merdiman, qatanê cîyayan ê bajarî bi fotografkaşîye bimojno. Pêşangehî de bê xebatanê mîrasê kulturî yê Amed û herême ser o, weçînayîşê projeyanê fotografîyan ê demanê cîyayan zî cayê xo gênê.
Kaplane ard ziwan ke girseyêka başe ya amedijan London de ciwîyena û hemwelatîyanê xo dawetê pêşangehî kerdî ke bibê hemparê hîkayeyê Amedî yo ke bi rayîrê hunerî şîyo London: “Mojnayîşê dewlemendîya kulturî ya Amedî warê hunerê mîyanneteweyî de seba mi zaf manadar o; amancê mi no yo ke ne tena dîmenê fîzîkî yê bajarî, vîr, ruh û dewsê ke wextî ra ameyî arêdayene zî bêrê resnayene.” Pêşangeh seba zîyaretî akerde yo û paweno ke bê hezkerdoxanê hunerî, heme amedij û şarê herême yê ke London de ciwîyenê, zîyaret bikerê.
