Serekê Komara Îranî Mesud Pezeşkîyanî va ke Îranî şer nêdayo destpêkerdîş û qedênayîşê şerî mabenê Îran û DYA’yî de bi qerarê Washîngtonî ra girêdaye yo.
Pezeşkîyanî New Yorkî de, çarçewaya kombîyayîşanê Heyeto Pêroyî yê Neteweyanê Yekbîyayeyan de, Fox News’î rê qiseykerd û va: “Amerîka do qerarê bido ka wazena no şer biqedêno ya nê.”
Ey dîyar kerd ke Îran şer nêwazeno la eke hêriş welatê ey ser o dewam bikerê, do Îran ‘bihêzdar û qerardarîye’ cewab bido. Goreyê Pezeşkîyanî, zextê ke Teheranî ser o yê seba teslîmbîyayîşê teberê çarçewaya huqûqê mîyanneteweyî de, nêyenê qebulkerdene.
Sewbîna Pezeşkîyanî va ke aşma hezîrane de mabenê Teheran û Washîngtonî de tayê prensîban ser o pêkerdişêk bîyo û Îran hedre yo ke ê bingeyan ser o pêvînayîşan bidomno.
Derheqê programê nukleerî de zî Pezeşkîyanî va ke Îran amancê vîraştişê çekê nukleerî nêkeno û programê ey seba amancanê aştîye yo.
Ey sewbîna derheqê rewşa rayberê dînî yê Îranî Mucteba Hamaney va ke nêzdî aşmêk verê ê dîyo û hewt saetî ey reyde mendo. Goreyê Pezeşkîyanî, rewşa weşîya Hamaneyî baş a.
