Serekkomarê Îranî Mesud Pezeşkîyanî dîyar kerd ke DYA hêrişê binawanîya sîvîlan kerdo û wina vat: “Eke Amerîkayî cengawer ê, wa bêrê hemverê hêzanê ma yê leşkerî yê cesuran.”
Serekkomarê Îranî Mesud Pezeşkîyanî vera Washingtonî eşkerayîya huşke daye. Pezeşkîyanî serê platformê medyaya dîjîtal yê X’î de eşkerayîye daye û DYA sucdar kerd ke binawanîya sîvîlan û hewcedarîya bingeyênan ê şarî keno hedef. Serekkomarê Îranî tehdîd kerd û nê çîyî vatî: “Eke Amerîkayî cengawer ê, wa bêrê hemverê hêzanê ma yê leşkerî yê cesuran.”
Çira vera binawanîya sîvîlan, rezervanê werdî û çimeyanê debare yê merdiman şer kenê?” Pezeşkîyanî sewbîna zî astengkerdişê hewcedarîya awe, xida û dermanan rexne kerd û wina vat: “Şarê ma teslîm nêbeno. Îran teslîm nêbeno.”
Hurmuz de vera keştîya ticarî hêriş
Badê eşkerayîya Pezeşkîyanî ame parekerdene ke Kendawa Hurmuzî de keştîyêka ticarî rastê hêrişî ameya. Goreyê rayedaranê Îranî, keştîya roja yewşemeyî dewrê saete 05:00î de qeraxê girawanê Hengam û Kişmî de bîya hedefê hêrişêk. Walîyê Kişmî Emîr Teymûrîyî televîzyonê dewlete û ajansê xeberan Tasnîmî rê eşkera kerd û va ke hêriş de kesêk merdo û 3 kesî zî birîndar bîyî. Teymûrî derheqê hêrişî de hetê kamî ra ameyo kerdene agahî nêda.
Ame dîyar kerdene ke saetanê şewe de dorûverê Kişmî de ke girawa tewr pîle ya Kendawa Hurmuzî ya, xeylê teqayîşî virazîyayê.
