Fedakar (Hîkmet Demîr) dewa Nanikasê Tetwanê Bedlîsî de ameyo dinya. Gedeyîye ra nat tim keyeyê xo rê ardim kerdêne û wexto ke dewe de vindî bîyêne, her kesî zanayêne ke o koyan ra gêreno.
Mekteb ra zaf hes nêkerdêne û 3 serrî dima mekteb caverda; dewe de heywandarî û şiwanîye kerdêne. Wexto ke qetlîamê Helebceyî bî, çakêto ke pîyê ci ey rê herînaybî, şawit Helebce rê û maya xo ra vat: “Ê zî gedeyê to yê.” Dima seba ke hetkarîya ekonomîya keyeyê xo bikero şi Îstanbul û înşaatan de xebitîya, la hesreta koyanê Kurdîstanî zerrîya ey de bîye. 1992î de Îstanbul ra verê xo da koyan, nameyê Fedakarî xo ser na û 1995î de Zap de şehîd bî.
Keyeyê Demîrî zî badê teda û zordarîya dewlete koç kerd Îstanbul. Xebera şehîdbîyayîşê Hîkmetî roja verêne ya veyveyê lajê apê ey Mehmet Nûrî de maya ey Gulendane rê ameye; aye bi heme dejê xo bêveng mende ke veyve nêxerepîyo. Pîyê ey Ebdulbarî zî tu çî nêvat, çunke zanayêne ke Hîkmetî o rayîro pîroz bi keyfweşî weçînayo. 1997î de keyeyê Demîrî de lajêko bîn ame dinya û bi pêşnîyazê tepişteyêkî nameyê ey zî bî Fedakar. Warezayê ey Mazlûm Akman zî sey xalê xo bî şorişger, nameyê xalê xo Fedakar girewt û 2022î de Gabar de şehîd bî.
Maye Gulendane Demîr vat: “Tim şîyêne koyan; penîr, rûn û tewr zaf maseyan ra hes kerdêne. Qiseykerdiş û her hereketê ey sîyasetî ser o bî; bi aqilê xo partî nas kerd. Roja veyveyî xebera şehîdbîyayîşê Fedakarî ameye; mi vat no zî veyveyê lajê min o, mi tu çî nêvat. Kesêk mi ra vat ‘şehîdê şima est o’, mi vat ‘lajê mi birayê şima yo zî, sereyê ma sax bo’. Mi vat qey ez qîrena, la mi hîs kerd ke ez huyena; ez seba kesê ke rayîrê merdimîye weçînayo, senî biberma? Badê veyveyî mi pîyê ey ra vat: ‘sereyê to weş bo, lajê to şehîd o.’ Ey tu çî nêvat, çunke ey zî waştêne lajê ci tewrê têkoşînî bibo. Verê şîyayîşî lajê mi mi ra vatbî ‘ez şina, xora gedeyê to yê bînî zî est ê’; mi vat ‘meşo’, la o şi Îstanbul û uca tewrê ci bî.”
