Merkezê Îrtîbat û Çapemenîye yê HPGyî dîyar kerd ke wextê peyên de bi nameyê Gerîlayanê Azadîye yê Kurdîstanî şarê welatparêzî û dormeyanê cîyayan ra waştişê hetkarî yeno kerdene û na babete de veng da şarî ke wa hişyar bibo.
Merkezê Îrtîbat û Çapemenîye yê Hêzanê Pawitişê Şarî (HPG) derheqê kesê ke serê nameyê hêzanê înan de şarê welatparêzî, karsazan û dormeyanê cîyayan ra hetkarî arê danê de eşkerayîye daye. HPGyî eşkerayîya xo de wina vat: “Wextanê peyênan de agahîyî resayî destê ma ke yeno vatene, tayê şaristanan ê Tirkîya û Vakurê Kurdîstanî de bi nameyê Gerîlayanê Azadîye yê Kurdîstanî şarê ma yo welatparêz, karsazan û dormeyanê cîyayan ra waştişê hetkarî yeno kerdene. Na agahîya ke zaf merkezan ra ameye hetê ma ra ameye cigêrayîş kerdene. Netîce de ame tespîtkerdene ke na rewşe de cayanê ke gerîlayê ma tede yê û cayanê ke tede nîyê de, tu kesî ra waştişê hetkarî nêameyo kerdene.
Semedê naye ra ca bi ca, ê kesê ke bi nê qaydeyî waştişê hetkarî kenê, kesê wina ke tu eleqe û têkîlîya înan bi gerîla û têgêrayîşê ma çin a. Reyna agahî ameyî destkewtene ke na babete de grûbê çeteyan bi zanayîş kewtê dewre û nê pratîkî hetê nê grûban ra ameyê kerdene. Ma şarê xo yo welatparêz, dostanê xo û dormeyanê cîyayan rê veng danê ke çi beno wa bibo, bawerîya xo bi nê kesan meyarê ke bi not yan zî metodanê bînî resenê şima, vera kesê ke bi nameyê Gerîlayanê Azadîye yê Kurdîstanî hetkarî wazenê hişyar bibê.”
