KCKyî da zanayene ke hedîsyê peyênî yê Kobanî danê mojnayene ke hukmetê Şamî yê demkî îradeya herêmî red keno û wina vat: “Ganî hukmatê Şamî yê demkî xo nê helwest, nêzdîbîyayîş û mudaxeleyan ra dûrî bigîro ke do no zerar bido înan.”
Hemserekîya Konseya Rayberdişî ya KCKyî derheqê hedîseyanê peyênan ê Rojawanê Kurdîstanî bi taybetî Kobanî de badê ke bi hawayêko hovane şehîd Sîpan Hiznî ame qetilkerdene qewimîyayî, eşkerayîye daye.
Eşkerayîya Hemserekîya Konseya Rayberdişî ya KCKyî wina ya:
“Ma keyeyê Sîpan Hiznî yo ke Heseke de ame qetilkerdene û keyeyanê 9 merdimanê ma yê ke Kobanê de zîndan de cuya xo ra bîyî serweşîye wazenê, birîndaran rê zî şîfaya xeyrî wazenê.
Şorişê Rojava û Rayberîya Xoser a Vakur û Rojhelatê Sûrîya 6ê sibata 2026î de çarçewaya planêkê mîyanneteweyî de bîye hedefê hêzanê rayberîya demkî ya Sûrîyeyî ke zafanîya înan HTŞ ra yenê pê. Rayber Apoyî vera nê hêrişan waşt ke no problemo ke serkêşîya ci de Tirkîya semedê pêro welatanê herême nîşan dana, çarçewaya sîyasetê entegrasyonê demokratîkî de bi rayanê aştîyane bêro çareserkerdene. Dima nê vengdayîşî mabênê hukmatê Şamî yê demkî û Rayberîya Xosere de pêameyişêk virazîya. Rayber Apoyî verê cû zî semedê çareserîya probleman a serê bingeyê demokratîkbîyayîşê Sûrîyeyî perspektîf dabî. Zaf reyî Rayberîya Xoser a Vakur û Rojhelatê Sûrîya rê zî ard ziwan ke no perspektîf bi entegrasyonê demokratîkî eşkeno bîyaro ca. Hetê demokratîk ê entegrasyonî zî pê dîyayîşê pêro nasnameyanê cîyayan bi hawayêkê azad û têduşt eşkeno bi ca bêro.
Rayberîya Xosere bi aşman o ke semedê entegrasyonê demokratîkî hem hukmatê Şamî reyde pêvînayîşan kena hem zî nê warî de yew têkoşînê komelî domnena. Labelê wextê peyênî de aseno ke babeta entegrasyonê demokratîkî de problemî qewimîyenê. Cayê ke perwerdeyê bi ziwanê dayîke yo ke semedê yew şarî teberê munaqeşeyî de yo bêro qebulkerdene, yeno waştene ke perwerdeyê bi ziwanê dadî yê ke 14 serrî yo Rojava û wareyanê Kurdan de yeno dayene, bêro astenkerdene. Yeno waştene ke perwerdeyê bi Kurdkî bi hawayêko cidî bêro sînorkerdene. No hêrişo ke serê perwerdeyê 14 serran yeno kerdene mojneno ke hukmatê Şamî yê demkî nêwazeno bi hawayêko raştikên estbîyayîşê Kurdan nas bikero. Bi nê hawayî versîyono dînperest ê neteweperwerîya Baasî yeno ferzkerdene.
Şarê ma û ciwanî bi rojan o vera nê çîyî pay ra yê. Nîşan da ke ê do wayîrê perwerdeyê bi ziwanê dayîke bivejîyê. Na hêza rêxistinkerde ya şarê Kurdî do bikero ke perwerdeyê bi ziwanê dayîke dewam bikero. Şar û wendekarî vanê; perwerdeyê bi ziwanê dadî xeta ma ya sure ya. Vatişê ‘Zemanê Baasî de qet nêamebî musnayene’ tena yew demagojî ya. Eke na mesele bi rejîmê Baasî bêro muqayesekerdene, no do destpêk ra bibo sebebê afernayîşê zemînê sînorkerdena cuya demokratîke û azade ya şarê Kurdî. Şarê ma mojna ke ê do kayanê bi nê şeklî qebul nêkerê.
Entegrasyono demokratîk verê her çîyî bi qebulkerdişê demokrasîya herêmî, bi qebulkerdişê îradeya herêmî beno. Hedîseyê peyênî yê Kobanê eşkera kerd ke hukmatê Şamî yê demkî îradeya herêmî red keno. Semedê problemanê ke wareyê herêmî de bêrê çareserkerdene, erşawitişê hêzêk yê Şam û Helebî ra yeno manaya dewamkerdişê kulturê îdareyî yê îqtîdarê Baasî.
No nêzdîbîyayîşê hukmatê Şamî yê demkî tena Rojava û Sûrîye de nê, çar hetanê Kurdîstanî û pêro dinya de bîye sebebê nêrazîbîyayîşê Kurdan. DEM Partî mudaxeleya Kobanê sey provokasyonêkê vera prosesê entegrasyonê demokratîkî erjna. Kemîbîyayîşê nifûsê Kurdan ê Rojava û Sûrîye goreyê parçeyanê bînan ê Kurdîstanî nîno a mana ke bêwayîr ê û do nê hêrişî qebul bikerê.
Kurdê ke Rojava û Sûrîye de yê şorişê demokratîk kerdo. Nê şorişî hişmendî, îrade û rêxistinkerdiş da înan. Şarê ma eşkeno nê hêzê xo bi çalakîyanê demokratîkan bimojno ra û her tewir hêrişan bişikno. Demokratîkbîyayîş û heqê bingeyênî yê demokratîkî bi vindertiş nê eşkenê bêrê pawitene nê zî eşkenê bêrê destvistene! Aye ra şarê ma eşkeno heqanê xo yê demokratîkan çarçewaya heqdarîye de bi kar bîyaro. Helwestê şar û wendekaran a semedê perwerdeyê bi ziwanê dayîke nimûneyêk muhîm yê xebitnayîşê heqanê demokratîkan o. Semedê pêtkerdiş û domdar verdayîşê têkoşînê demokratîkî, zaf muhîm o ke rêxistinbîyayîşê komelê demokratîkî bêro hîrakerdiş û xorînkerdene.
Ganî hukmatê Şamî yê demkî xo nê helwest, nêzdîbîyayîş û mudaxeleyan ra dûrî bigîro ke do no zerar bido înan. Gerek hêzê Kurdan semedê demokratîkbîyayîş û asayîşê Sûrîya bi kar bîyaro. Dewleta Sûrîya wexto ke cuya demokratîke û azade ya pêro nasname û bawerîyan nas bikero, a wext eşkena aram û xurt biba.”
