Bi mektubêko akerde ke Serekê Komîteyê Wezîran ê Konseya Ewropa Gabriel Revelî rê ame şawitene, partî, rêxistin û şexsîyetanê Başûrê Kurdîstanî waşt ke qerarê DEHM’î yê “heqê hêvîye” bêro naskerdene û Abdullah Ocalan seba beşdarîya prosesî azad bibo.
“Komîteyê Azadîye yê Abdullah Ocalanî” yê Başûrê Kurdîstanî bi îmzaya 28 partîyanê sîyasî, rêxistin û şexsîyetan mektubêk şawit Gabriel Revelî rê ke Temsîlkarê Daîmî yê Monakoyî yê Konseya Ewropa û eynî wext de Serekê Komîteyê Wezîran o.
“Vengdayîş nêzdîbîyayîşêko newe pêşkêş keno”
Mektubî de îfade bî ke wexto ke şerê Rojhelatê Mîyanênî krîzanê ekonomîk û sîyasîyan ê xorînan vejeno, vengdayîşê “Haştî û Komelê Demokratîkî” yê Abdullah Ocalanî vengê çareserîya bêşîdet berz kerdo û seba pêkewtişanê herême nêzdîbîyayîşêko newe ano. Nuştoxanê mektubî ard vîrî ke badê vengdayîşê 27ê sibate 2025î PKKyî stratejîya têkoşînê çekdarî verdaye, gerîlayan bi merasiman çekê xo veşnayî û bi no hewa pêkewtişê Tirkîya, Sûrîye û vakurê Iraqî vindertî; Tirkîya bîye yew ê tayê welatanê herême ke rasterast nêkewtî mîyanê şerî. Ocalanî hetanê pêkewtişanê Sûrîye rê zî veng dabî ke seba îstîqrarêko mende pêkewtiş vindê û çareserîya sîyasî bêro dîyene.
Barê herême û piştîdayîşo mîyanneteweyî
Mektubî de ame dîyarkerdene ke Herêma Kurdîstanî bi hêrişanê hewayî û bejî yê artêşa tirkan bi seyan sîvîlî vindî kerdî û barê meseleya kurdan a Tirkîya zaf anto; la badê vengdayîşî pêkewtişê herême vindertî û hem berpirsîyaranê herême hem zî raya pêroyî ya kurdan vengdayîş qebul kerd. Ame vatene ke bi seyan dezgeh û şexsîyetanê mîyanneteweyîyan tede 88 wayîrê xelata Nobelî yê, nê cehdî rê piştî daye, la Ocalan seba tepiştişê xo yê Îmraliyî nêeşkeno bi hawayêko çalak beşdarê prosesî bibo; şertê hepisxane nêvurîyayî û têkilîya ey a dinyaya teberî girêdayeyê qeraranê sîyasîyan ê berpirsîyaranê Tirkîya mende. Nuştoxan ard ziwan ke raporê sibate 2026î yê komîsyona eleqedare de tatbîqkerdişê heme qeraranê DEHM û Dadgeha Qanûnê Esasî ya Tirkîya ame tewsîyekerdene, la girewtişê babete ya perspektîfê vera terorî ra dîyalog û pêkerdiş asteng keno.
Waştişî
Îmzakerdoxan venga Komîteyê Wezîran ê Konseya Ewropa da ke qerarê 2014î yê DEHM’î yê derheqê “Heqê Hêvîye” yê Abdullah Ocalanî nas bikero û na sey gama verêne ya çareserîya rewşa ey a huqûqî û sîyasî nirxna. Bê ney înan waşt ke Ocalan azad bibo û seba beşdarîya ey a pratîke ya prosesî îmkanê temam û bêsînorî bêrê temînkerdene.
Kamî îmza kerd?
Mîyanê îmzakerdoxan de partîyê sey Partîya Zehmetkêşanê Kurdîstanî, Partîya Komunîste ya Kurdîstanî, Tevgera Helwesta Nîştimanî, Hereketê Şarî yo Demokratîk ê Kurdîstanî, YNDK, Partîya Keske ya Kurdîstanî û Partîya Parêzgeran a Kurdîstanê; rêxistinê sey Hereketê Azadbûnî, Rêxistina Dabînî, REPAK, Torra Rêxistinanê Kurdîstanî yê Vera Jenosîdî, Kampanyaya “Cuye” ya Vera Îdaman, Kurdsayd, Rêxistina Felsefeya Yesna Zerdeştî û Rêxistina Serbestîya Cinîyan est ê. Şexsîyetan ra zî Wezîra Turîzmî ya verêne Kafîye Silêman, endamê verênî yê Parlamentoyê Iraqî Rêzan Şêx Dilêr û Bilêse Cebar Ferman, endamê KNKyî Mihemed Emîn Pêncwênî, endamê Parlamentoyê Herêma Kurdîstanî Dr. Fayîq Gulpî û Kardo Pîrdawid, akademîsyenî Prof. Dr. Şoreş Hesen Omer û Prof. Dr. Merîwan Omer Dewlet, Serekê Komela Pêşmergeyanê Dêrînan Cemîl Hewramî, aktîvîste Şine Elî Xeyat û temsîlkarê zerdeştîyan Esrewan Awat Hisamedîn mektub îmza kerd.
