Endamê JÎTEM û Hîzbî-Kontrayî 32 serrî ra ver Dewa Kulîncî ya Rihayî de rojnameger Kemal Kiliçî bi taksîya torosî remna û kişt. 31 serrî vîyartî, la hema zî kiştoxî nêameyî muhakemekerdene.
Serranê 1990 û 2000î de zêdeyê 17 hezar merdimê kurdî hetê JÎTEM û Hîzbî Kontrayî ra ameyî kiştene. Kesê ke ameyî kiştene verê ameyî remnayene û dima ameyê kiştene. Cenazeyê înan yan eştê kenarê rayîran yan zî çalanê asîtî de vîndî kerdî. Zafê înan goranê komî de nimîyayî. Mîyanê kesanê ke ameyî remnayene û kiştene de sîyasetmedar, rojnameger û temsilkarê dezgehanê sivîl û demokratîkan zî est bî. A game 17 hezar merdiman mîyan de nêzdîyê 50 rojnamegerê kurdî zî ameyî kiştene. Rojnamegero ke verê hetê JÎTEM-Hîzbî Kontrayî ra ame kiştene Cengîz Altun bî. JÎTEM û Hîzbî Kontrayî 1992 de 8 rojnamegerî û 1993 de zî 13 rojnamegerî kiştî.
Yew kesanê ke serranê 1990î de wextê ke Tansu Çîler Serekwezîre, Mehmet Agar Wezîrê Karanê Zereyî û Dogan Gureş zî Serfermandarê Pêroyî yê Artêşî bi, ame kiştene zî Temsilkarê Rojnameya Ozgur Gundemî yê Rihayî Kemal Kiliç bi. Zaf rey Kemal Kiliçî ame tehdîtkerdene û a game Temsilkarê Rojnameya Ozgur Gundemî yê Serêkanîye Huseyîn Denîz kişt zî; Kemal Kiliçî xebatê xo bi hawayêko serûber ramitî. La 4 kesî ke 18ê sibata 1993î de bi wesayîta Torosî rayîrê Riha û Akçakaleyî de çarraya Dewa Kulunceyî de vernîya Kemalî girewte, wesayît ra ameyî war û Kemal kişt.
Kiştoxê Kemal Kiliçî seba ke Rojnameyê Ozgur Gundemî de xebitîyayêne hetê leşkeran ra derheqê ey de malumat ame arêdayene û ame tehdîtkerdiş û dima zî ame kiştene. Kiştişê Rojnameger Kemal Kiliçî ra 32 serrî vîyartî. 31 serrî yo kiştox hema nêameyo muhakemekerdene û cezakerdene. Birayê Kemal Kiliçî Mahmut Kiliç erjnayîşê xo yê verênan de ke Ajansa Xeberan a Dîcle (DÎHA) rê kerdî, dîyar keno ke walîyê a game Zîyaettîn Akbulut ke demê AKP’yî de bi parlamenter, berpirsîyarê kiştişê birayê ey o. Kemal Kiliç, ard vîrê ke a game birayê ey Kemalî walî ra pawanî waştbi la walî nêdabi. Mahmut dîyar keno ke berpirsîyarê kiştişê Kemalî walî yo û reyna demê AKP’yî de bi parlamenter.
Mehkemeya Ewropayî Tirkîya mehkum kerdbi
Walîyê verênî yê Rihayî Zîyaettîn Akbulut, reyna sey berpirsîyar ame dîyene zî demê AKP’yî de 3 dewreyî bi parlamenterê Tekîrdagî. 31 serrî vîyartî, la cigêrayîşê dosyaya kiştişê Kemal Kiliçî de qet vurîyayîş nêbi. Mehkema 18ê sibata 2013î de dosya sey “demvîyarta” mojnaye û serê dosya girewt. Bi no hewa peynîya muhakemekerdiş û şopnayîşê kiştoxî ard. Çeka bi markaya ccech a 9 mm a ke Kiliç pê ameyo kiştene 1993î de Amed de endamê Hizbullahî Huseyîn Guneyî ser de vejîya. Na çeke kiştişê Kiliçî de zî mîyan de 15 hedîseyanê kiştişanê kerdoxê înan nêdîyayan de ameya şuxulnayene û Huseyîn Guneyê ke Êlihî ra yo îfadeyê xo de ca girewtişê xo yê kiştişê Kiliçî de înkar kerdbi. Vatbi ke endamêkê verênî yê hizbullahî çeke daya ey. Guney Mehkemeya Emnîyetî ya Dewlete ya 3. (DGM) de 5 serrî ame muhakemekerdene û 23ê adara 1999î de seba ke “endamê hizbullahî yo” cezaya muebetî girewt.
Kiliç rojnamegeranê ke Demîrelî bi vatişê “ê rojnameger nîyê, mîlîtan ê” hedef mojnaybî ra yew o û dosyaya ey de edalete nêbîye, dewlete kiştişê Kemal Kiliçî de Mehkemeya Heqanê Merdiman a Ewropa (DHME) de mehkum bîye. Parlamenterê verênî yê AKP’yî Zîyaettîn Akbulut o ke kiştişê Kiliçî ra berpirsîyar o zî hetê DHME’yî ra seba ke îfade bido ameybi vengdayene la nêşi. DHME’yî qerarê xo yê 28ê adara 2000î de dewlete “binpaykerdişê heqê ciwîyayîşî” û “Cigêrayîşêko hîra nêramito” ra sûcdar dîye û 38 hezar sterlînî ceza birnaye.
