Mardîn – Nisêbîn de kesê ke tewrê vîrardişê şehîdanê Têgêrayîşê Azadîya Kurdîstanî bî, hîs û waştişê xo yê seba şehîdan ardî îfade kerdê. May û welatijê Nisêbînî dîyar kerd ke heta ewro bi sayeya Têgêrayîşê Azadîye, gonîya şehîdan û felsefeya Rayberê Şarê Kurdî Abdullah Ocalanî, estbîyayîşê şarê kurdî ameyo pawitene û veng da şarê kurdî ke wayîrê erjanê şehîdan vejîyê û yewbîyayîşê xo awan bikero.
Têgêrayîşê Azadîya Kurdîstanî şehîdê ke tarîx û cayanê cîyayan de cuya xo ra bîyî, eşkera kerdî. Zafê cayanê Vakurê Kurdîstanî de vîrardişê şehîdan bi rayberîya Komeleya Yewî, Kultur, Piştgîrî û Hetkarîya bi Keyeyanê ke Dergûşê Şaristanîye de Merdimê Xo Vindi Kerdî (MEBYA-DER) virazîyenê. Qezaya Nisêbînî ya Mardînî de zî seba Şehîdanê Azadîya Kurdîstanî programê vîrardişî virazîyeno. Vîrardişo ke bi tewrbîyayîşê hezaran welatijan, Meclîsê Dayîkanê Aştîye, parlamenter û rayberê DEM Partî, DBP û MEBYA-DER’î dewam keno, vîrardiş rastê wayîrvejîyayîşêko xurt ê şarî yeno. Meydanê vîrardişî de pankartê ke tede nûşteyê derheqê têkoşînê azadîye û rûmetê şehîdan estbî ameyî daleqnayene û girseyî bi berzkerdişê sloganan girêdayîşê xo ya bi têkoşînê inan nîşan da. Vîrardişê şehîdanê Nisêbînî de peyamê seba yewbîyayîşê neteweyî, azadî û aştîyêka birûmete vejîya vernî. Roja dîyine ya vîrardişê şehîdan de kesê ke tewrê vîrardişî bî, hîs û waştişê xo yê seba şehîdan ajansê ma rê pare kerdî.
‘Ganî şarê kurdî her çar parçeyan de bibo yew’
Maya Rahşan Demîrele, Emîne Demîrel bale ante bedêlanê tarîxîyan ser û wina vat: “Seba azadîya Kurdîstanî ma canê xo da. Şehîdanê ma, ma çinbîyayîş ra ardî estbîyene. Felsefeya Serek Ocalanî sey deryayêko bêpeynî yo. Ma sey mayan endî nêwazenî gonî birîjîyo, dayîkê tu şaran bibermê. Ma waştişê aştîye, rûmet û xoserîye kenî. Gerek şarê kurdî her çar parçeyan de bibo yew.”
‘Ganî ma wayîrê ziwan û erdê xo vejîyê’
Zuhrîye Kayika ke lajê ci verê serranê 1990î de tewrê têkoşînê azadîye bîbî, dîyar kerd ke şarê kurdî bi sayeya nê têkoşînî nasnameyê xo pawito û nê çîyî ardî ziwan: “Verê cû ma nêeşkayêne vajê ma kurd ê. Domanê ma tersayene. Bi sayeya gonîya şehîdanê azadîye ma musayî, ma hişyar bîyî û ma xo nas kerd. Ewro ez sereberz a ke vînena şarê ma resayo nê sevîyeyî.”
‘Xîyaneto ke ziwan û herre ser o virazîyeno, nêyeno qebûlkerdene’
Emre Bîlenî zî dîyar kerd ke no proses firsendêko tarîxî yo û nê erjanyayîşî kerdî: “Ganî dewlete zî, şar zî bi zanayîş nêzdîyê nê prosesî bibo. Bi hezaran ciwananê ma canê xo seba nê ziwanî û na herre feda kerd. Şehîdê têkoşînê azadîye tena yê keyeyan nîyê, şehîdê pêro şarê kurdî yê 60-80 mîlyonî yê. Xîyaneto ke ziwan û herre ser o virazîyeno, nîno qebûlkerdene.”
Vengdayîşê wayîrvejîyayîşê şehîdan
Ferhan Dilbîrîn û Yusra Budake zî ardî ziwan ke bingeyê nê têkoşînî xoverdayîşê şarî yo û veng da ke wayîrê prosesê aştî, demokrasî û erjanê azadîye vejîyê.
