RİHA – Rojnamager Hêlîn Asmîn dîyar kerd ke 25ê tebaxe seba Sûrîya rojêka tarîxî bî û vat: “HSD’yî gureyê xo temam kerd û tewrê kar û baranê dewlete bî. Endî bi fikrê neteweya demokratîk û entegrasyono demokratîk qonaxêko newe dest pêkeno.”
Badê peymana 29ê çele ya mabênê Rayberîya Xosere Hêzanê Sûrîya Demokratîk (HSD) û Hukmatê Demkî yê Şamî de prosesê entegrasyonî yê mabênê Rojava û Sûrîya de dewam keno. Goreyê peymana 29ê çele xeylê sazgehanê leşkerî, îdareyî û snb. entegre bîyî. 24-25ê tebaxe de Şam de çarçewaya temamkerdişê madeyê peymana 29ê çele ya mabênê HSD û Şamî de pêvînayîşê krîtîkî ameye kerdene. Pevînayîşan de heyetê Rojava xeylê waştişî made bi made teslîmê heyetê Şamî kerdî. Nêyeno zanayene ke gelo nê madeyî heme ameye qebulkerdene yan nê. Netîceyê pêvînayîşan de Fermandarê Pêroyî yê HSDî Mazlûm Ebdî eşkera kerd ke HSD’yî xo fesîh kerdo.
Rojnameger Hêlîn Asmîn a ke Rojava de averşîyayîşan şopnena derheqê prosesê entegrebîyayîşî Rojava-Sûrîya de Ajansê welatî rê qisey kerd.
’25ê tebaxe rojêka tarîxî ya’
Hêlîn Asmîn vist vîr ke no proses bi asanî nêvirazîyayo û bale ante serê xoverdayîşê aşma çele û wayîrvejîyayîşê şarê Kurdîstanî û hemsencîya newî yê sîyasî û wina vat: “25ê tebaxe seba şarê kurdî û taybetî seba Sûrîya rojêke tarîxî ya. Seke Fermandarê Pêroyî yê HSD’yî Mazlûm Ebdî zî dîyar kerd; HSDî gureyê xo temam kerd û tewrê kar û barê dewlete bî. Nika mîyanê newebîyayîşêke û gureyêke newe de bi karêk o newe dest bi awankerdişî Surîya keno. Badê xoverdayîşê Helebî, Şêxmeqsûd û Eşrefîye, bi seferberîya her çar parçeyanê Kurdîstanê û peymana 29ê çele ra madeyê esasî yê adirbestî û entegrasyonê ame dîyar kerdene.”
Agêrayîşê Efrînî û garantîkerdişê ziwanê Kurdkî
Hêlîn Asmîn da zanayene ke yew netîceyanê tewr muhîmî yê nê prosesê agerayîşê şarî herêmanê îşxalkerdeyî û fermîbîyayîşê destkewteyanê ziwanî û wina qisey kerd. “Nê madeyê esasî agêrayîşê şarê Efrînî yê serê herra xo bî û koçberanê Serekanî û Girê Sipî zî paweyê ke agêrê. Eynî wext de babeta tewr sereke ziwan o. Bingeyê perwerde û wendegehanê ke 15 serranê şorişî de ameyê awankerdene, pêvînayîşan hemînan de madeya sereke bî. Seke Îlham Ehmede zî dîyar kerd, heqê heme neteweyanê ke bi ziwanê xo perwerde bivînê.”
Rolê YPJ’yî û temsîkarîya cinîyan Şam de
Derheqê munaqeşeyan de serê ameyoxê YPJ’yî û rolê cinîyan ê rayberîya neweyî de Hêlîn Asmîn bale ante serê pêvînayîşanê ke Şam de bi ca ameyê û vat: “Temsîlkarîya cinîya kurdî bi pêşengîya Îlham Ehmed û Newroz Ehmed Şam de qesra serekkomarîye de ronişt. Krîzê serê entegrasyonê YPJ’yî ver bi çareserî şino. Goreyê vatişan û munaqeşeyanê ke estê yena pawene ke YPJ sey hêzê asayîşê zereyî û xoser cayê xo bigîro. Kombîyayîşê serê na babete de hema zî dewam kenê. Yeno pawene ke Fermandar Mazlûm Ebdî û Îlham Ehmed mîyanê hukmatê Sûrîya de ca û gureyanê muhîman bigîrê.”
‘Seba kurdan îmkanêko pîl û tarîxî yo’
Hêlîn Asmîn dîyar kerd ke na game seba heme komelî Sûrîya de berêko newe akeno û qiseykerdişê xo wina qedêna: “Vernîya nika kurdî sey netewe û wayîrê nasnameyî nêameyê şinasnayene, la ewro cinî û sîyasetkaranê kurdî qesra serekkomarîye de bi ziwanê xo, xo îfade kenê.Endî pêroyî Sûrîya de kurdî bi fikrê neteweya demokratîk tewrê kar û baranê dewlete benê. No seba sîyasetê kurdî îmkanêko gird o ke tena Rojava de nê, heme şaristanan ê Sûrîya de estbîyayîşê xo dîyar bikerê û bi rolêko xurt wurzê we.”
