Dayika Aştiyê Aklîme Hanas a ku du sal berê di qezaya trafîkê de bi giranî birîndar bûbû, tevî rewşa xwe ya giran jî li ser sendelyeyê bi teker hate serdana cangoriyên azadiyê ya li Parka Koşuyoluyê.
Yek ji Dayikên Aştiyê Aklîme Hanas a ku du sal berê di qezaya trafîkê de bi giranî birîndar bûbû, li ser sendelyeyê bi teker hate serdana şîna cangoriyên azadiyê. Bi alîkariya malbata xwe hate Parka Koşuyoluyê cihê ku şîn lê hatiye danîn.
Ji rêzê ve serdana malbatan kir û yek bi yek wêneyên cangoriyan maçî kir û malbatan silav kir. Dayika Aklîme tevî rewşa xwe ya giran jî xwe negirt, stran got û dirûşm berz kir.
Dema ku dayika Aklîme Hanas gihîşt cem hevala xwe ya têkoşînê Dayika Aştiyê Muşeref Ulker a ku kurê wê Zekî Ulker (Armanc Tolhildan) jiyana xwe ji dest daye, hev hembêz kirin û xemgîniya wan xwe da nîşandan. Her du dayikan lorand û cangoriyan bi bîr anîn.
‘Serê Serok Apo sax be’
Aklîme Hanas ji ajansa me re axivî û diyar kir ku ew ji bo bîranîna cangoriyan hatiye serdanê û wiha got: “Ez bi vî halê xwe ji bo şehîdên Kurdistanê hatime vir. Şehîd namirin. Serê gelê Kurd sax be. Serê Serok Apo sax be.”
Ew her dem di nav refên têkoşînê de bû
Ew yek ji dayikên pêşeng a têkoşîna azadiyê, aştiyê, demokrasiyê û edaletê bû. Di her çalakî û şahiyê de li refên pêş bû û bi stranên ku digot tê zanîn. Bêwestan têkoşiya û di her axaftin û çalakiyê de daxwaza azadiya gelê Kurd dikir.
Ew di meha Mijdara sala 2024an de bi qezayek trafîkê re rû bir û ma û bi bi giranî birîndar bûbû. Niha li malê di nav cihan de ye, bi alîkariya sendelyeyê xwe bi teker hate serdana şîn û bîranînê.
