Torra Heqanê Merdiman ê HRANAyî aşkera kerd ke rejîmê Îranî destê şefeqî de yew aktîvîst û mîyanê aşma verêne de zî 60 kesê bînî darde kerdê û bi nê hawayî binpaykerdişanê xo yê vera heqanê merdiman dewam keno.
Torra Heqanê Merdiman ê HRANAyî derheqê binpaykerdişanê rejîmê Îranî yê vera heqanê merdiman ê Rojhelatê Kurdîstanî û Îranî de zereyê aşma verêne de yew rapor weşana.
Rapor de ameyo dîyar kerdene ke dezgehê edaletî yê Îranî destê şefeqî de cezayê dardekerdişê aktîvîsto bi nameyê Mecîd Nadîn eyaletê Alborzî de caard. Mecîd hetê îstîxbaratê Pasdaran (Îtîlaat) ra Kerac de amebi girewtene û bi sucdarîya “tewrê çalakîyanê bi waştişê rijnayîşê rejîmî” cezayê dardekerdişî ci rê amebi birnayene.
Ame eşkera kerdene ke mîyanê na aşme de bi temamî 60 kesî bi cezayê dardekerdişî ke mabênê înan de cinî û domanî zî est ê, ameyî caardene. Di dewayî bi hawayêko eşkera ameyî kerdene, eynî wext de hetê dezgehê edaletî ra 11 cezayê neweyî yê dardekerdişî ameyî birnayene û qerarê 7 kesanê bînan zî hetê Mehkemeya Berze ya welatî ra ameyo tesdîqkerdene.
Heto bîn ra, tedayê ser azadîya fikrî resayî asta tewr berze; bi no qeyde ke 112 dewayê girewtişî û serdegirewtişê keyeyan ameyê qeydkerdene. Di netice de bi temamî cezayê 5 hezar û 73 aşmî hepisxane, 48 aşmî surgunkerdiş, 417 qamçîyî û cezayê madî ro 70 welatîyan ameyî birnayene. Reyna cezayê 77 serranê zîndanî ke daya 16 welatîyanê Mehabadî, nimûneyêko eşkera no zulmê edaletî yo.
