Amed –serê şehadetê deyîrbaz û têkoşera kurde Delîla (Şenay Guçer) ra 19 serrî derbaz bîyî. Mamostayanê Ma Musîcî ra Evîndar Dulek û Evîn Tiryakî, bi munasebetê serrgêra şehadetê Delîla ser o qisey kerd û dîyar kerd ke Delîla bi veng, def û vindertişê xo bîya sembolê cinîyanê kurdan û mîrasêko gird ê têkoşîn û hunerî pey xo de verda.
Delîla serra 1981 de qezaya Farqînî ya Amedî de ameya dinya û ciwanîya xo de verê xo da muzîk. Peynîya serra 1990î de Merkezê Kulturê Mezopotamya (MKM) ya Stenbolî de ca gêna û uca de perwerdeyê şan, tembûr û kulturî dengbejîye gêna û mîyanê grubanê muzîkî yê MKM de xebate kena.
Delîla serra 1999 de tewrê mîyanê refanê têkoşînê Têgêrayîşê Azadîye bena û xebatanê xo yê kulturî û hunerî koyî de zî dewam kena. Wexto ke aye gerîla bî, deyîra aye ya sey; “Zîlan”, “Jinên Azad”, “Şev Tarî”, “Can Welat”, “Dil Dixwaze Here Cengê” û “Roja Dayîkan” vîr û zerrîya şarî de cayêko bêemsal girewte.
Delîla 23ê tebaxe 2007 de herêma Besta ya Şirnexî de şerêke bi artêşa tirke de cuya xo ra bîye. Bi vengê xo û vindertişê xo yê şorişgêrî, Delîla vîrê komelî de sey mîrasêko gandar mende û dima ra zî cuya aye bîye babeta kitabê rojnameger Hasan Cemal ê bi nameyê “Delîla: Rojnuşteyê Koyî Cînîyêka Ciwan a Gerîla.”
Mamosteyanê Merkezê Ma Musîcî, tesîrê Delîla yê serê kultur, muzîk û têkoşînê cinîyan ajansê ma rê erjna.
‘Hem kulturê xo pawit hem zî şerê estbîyayîşî da’
Mamosteyanê Ma Musicî ra Evîndar Dulek ard ziwan ke Delîla vîrê cinîya kurd û muzîkê kurdî de şopêka xorîne verdaya û vat: “Aye wezîfeyêko zaf muhîm dabî serê milê xo û heta wextê şehadetê zî mîyanê şerî de bîbî, ziwan û kulturê pawit û resna na aste. 19 serrî yo ma her serre şehîd Delîla vîr anê. No dano mojnayene ke aye cuya xo serê bingeyêko xorîn ê îdeolojîk de awan kerda”
‘Ma do her tim wayîrê nê mîrasê xoverdayîşî vejîyê’
Evîndar Dulek vist vîr ke 19 serran ra ver wexto ke înan gedeyîya xo de televîzyonî ser o de deyîrê Delîla temaşe kerdêne, bi heyranî goşdarî aye kerdêne û qiseykerdişê xo wina dewam kerd: “Cinîyêke senî eşkena hem bibo şorişgêr hem zî wayîrê kulturê xo vejîyê, merdim nayê vindertişê aye de bi zelalî vîneno. Mîyanê şertanê giranan ê şerî de zî dest def û muzîkê xo rê fek veranêda, berhemê afernayî û vengê xo resna ma. Aye bi cuya xo da mojnayene ke merdim eşkeno eynî wextî de hem şerê estbîyayîşî xo bido hem zî ziwan, kultur û hunerê xo bipawo. Ma do her tim wayîrê nê mîrasê û xoverdayîşî vejîyê.”
‘Delîla seba cinîyanê kurdan bîya sembol’
Yew mamosteyanê Ma Musicî ra Evîn Tîryakî zî dîyar kerd ke neslêke bi deyîranê Delîla pîl bîyê û wina vat: “Wextê destpêke de ma no dî, ma vatênê cinîyêk senî eşkena serê nê koyan de mîyanê nê zor û zehmetî de nê çîyan bikera. La nika ma ewnîyenê, Delîla bîya sembola cinîya kurdî. Delîla kesêke bî la ewro bi hezaran Delîla nê rayîrî ser şinê.”
‘Amancê ma ganîbîyayîşî kulturî yo’
Evîn Tîryakî bale ante tesîrê deyîranê Delîla ser o û qiseykerdişê wina qedêna: “Wexto ke o hîs, o veng, ana ziwan, o heskerdiş û hesret serê ciwanan de taybetî serê cinîyanê ciwanan ê kurdî de tesîrêko zaf pîl viraşt. 19 serrî ver Delîla nê deyîrî vatêne la ewro zî rojevê ma de nê deyîrî seke ewro bêrê viraştene yenê vatene û yenê ciwîyene. Delîla, Mizgîn, Hozan Serhad û kesê ke seba kultur û hunerê xo têkoşîn daye bîyî sembol. Ma zî sey xebatkaranê kultur û hunerî şopdarê înan ê. Vera asîmîlasyonî, amancê ma o yo ke ma nê kultur û ziwanî vîrê şarê xo de gandar verdê.”
