Akademîsyen, nuştox û aktîvîstî zî mîyan de 26 kesan, bi amancê piştîdayîşî seba girewteyanê sîyasîyan ê Îranî, mektubêka akerde nuşt.
26 akademîsyen, nuştox, aktîvîstê sîyasî û heqê merdiman, seba girewteyanê sîyasîyan ê Îranî mektubêka akerde weşana û dîyar kerd ke ê bi înan rê mîyanê pêgirewtişî de yê û waştişê vindarnayîşê dardekerdene û veradayîşê girewteyanê sîyasî kerdê.
Îmzakerdoxê mektube, hêrişanê leşkerî, caardişanê Amerîka û Îsraîlî yê vera Îranî şermezar kerdê û rewşa girewteyanê sîyasî sey ke mabenê di hêzanê zordaran de mehsur mendê, pênase kerdê.
Mektube bi sernameyê ‘Mektubê Pêgirewtişî ya Girewteyanê Sîyasî yê Îranî rê: Şerê Emperyalîst û Dardekerdena Dewlete Biqednêni’ ame weşanayene. Miyanê îmzakerdoxan de Angela Davîs, Judîth Butler, Rashîd Khalîdî, Keeanga-Yamahtta Taylorû Michael Lowy ca gênê.
Îmzakerdoxan, mektube de, Komara Îslamî ya Îranî bi girewtişan, îşkence û dardekerdişî, Amerîka-Îsraîlî zî bi caardişanê leşkerî, wêrankerdişê binawanîya sîvîl û kiştişê sîvîlan sucdar kerdê.Mektube bale ancena pêlê girewtiş û dardekerdişanê yê Îranî ser û dîyar kena ke grûbê komelkî yê cîya yê sey karker, bêkar, Kurd, Ereb, Beluc û koçberê Afaganî ke raştê zext û ciyakerdişanê tewir bi tewiran yenê.
Îmzakerdoxan, peynîya mektubê xo de vengdayîşê rêxistinanê komelê sîvîl û grûbê vera emperyalîstan ê pêroyê dinya kerdê ke destekê xo seba girewteyanê sîyasî yê Îranî zêde bikerê, înan reyde têkîlî ronê û seba ke peynîya dardekerdişan bêro û girewteyê sîyasî bêrê veredayîş ganî zextan Komara Îranî ser o bikerê.
