Karkerê madenî 11 rojî yo ke seba heqê xo verê Wezaretê Enerjî û Çimeyanê Xozayî de çalakîye de yê. Karkeranê madenî dîyar kerd ke çîyê ke wezaret û wayîrê Yildiz Holdîngî înan rê kenê bêwijdanî yo.
Karkerê madenî yê ke girêdayeyê Sendîkaya Madenê ya Xoserî yê û Yildizî Holdîngê SSS yÊ Doruk Maden û Madenê Sêmî yê Eti yê Xarpêtî de xebitîyenê, seba ke heqê xo bigîrê ameyî Anqara. Karkerê ke ameyî Anqara, bi waştişê pêvînayîşê Wezaretê Enerjîye û Çimeyanê Xozayî, 11 rojî yo ke verê wezaretî de çalakîye de yê. Karkerî paweyê ke wezaretê reyde pêvînayîş bikerê û nêdayîşê heqê înan bêro çareserkerdene. Karkerî îstasyona Kitabxaneyê Neteweyî ra hetanî verê wezaretî bi şiklêko nêmviran rayra şîyê. Karkeran tîya de bi yew vengî sloganê ‘Alparslan Bayraktar wa vejîyo verê ma’, ‘Ma karker ê, ma heqdar ê, ma do serbikewê’ û ‘Piştî medê holdîngan, heqê ma mewerê’ berz kerdî. Karkeran tîya de pankartê ke ser o “Zerrn û sêm, sifr û madenê ma vetî, ma nêverdenê şima canê ma zî vejî” nûsîyaybî, berz kerdê. Karkeran baretê xo eştî erd û çalakîya vengvetene viraşte. Karkeran verê wezaretî de waştişê xo rayêka bîne ardî ziwan.
‘Wezaret û Yildiz Holdîng bêwijdan ê’
Murat Çelikî ke şîrketa Madenê Sêmî yê Eti yê Xarpêtî de xebitîyayo, dîyar kerd ke vera înan bêwijdanî yeno têgêrayîş û wina vat: “Ez zewijîyaye ya û 4 domanê mi estê. Wexto ke roşanê Remezanî ame, mi nêeşka domananê xo rê dîyarî bigîrî. Eynî çî seba Roşanê Qurbanî zî derbazdar o. Domanê mi ra yewî de nêweşîya epîlepsî esta, ez nêeşkena tedawîya ci bikerî. Wexto ke ma ameyî destbendkerdene, Mudirîyetê Emnîyetî de nûşteyêk balê mi ant. Vatbî ke ‘Polîs vera bêwîjdanan de yo’, de bêwîjdan ma yê yan ê ke bêwîjdanî keno şima yê? Ê ke bêwîjdanî kenê, wezîr û wayirê Yildiz Holdîngê Sebahattin Yildiz ê. Ma tena heqê xo wazenê. Embazêkê ke tîya de yê, keyeyanê înan de zî nêweşî estê.” Çalakîya karkeran do verê wezaretî de 24 saetan bi çalakîya roniştişî dewam bikera.
