16 baroyan paştî daye “Qanûnê Derheqê Pêtkerdişê Piştîdayîşê Mîlî û Pêameyîşê Komelkî de” ke Meclîs de ame qebulkerdene, la seba aştîya domdare serdestîya huqûqî, demokratîkbîyayîş, edaletê komelkî û pêtkerdişê heqanê bingeyînan waşt.
Baroyanê Semsûr, Agirî, Êlih, Çewlig, Bedlîs, Dêrsim, Amed, Colemêrg, Îdir, Qers, Mardîn, Mûş, Sêrt, Riha, Şirnex û Wanî derheqê qanûnî de eşkerayîyêka hempare daye.
Baroyan bale ante serê pêkewtişê ke teqrîben nêmseserra dewam kenê netîceyê giran ê komelkî ardî û serûberkerdişê ke hedefê ci bêvengbîyayîşê temam ê çekan û çareserîya problemanê huqûq û sîyasetê demokratîkî ser o sey gamêka tarîxî erjna.
Baroyan vat hetê teknîkê huqûqî û hîrayîya ci ra hetê qanûnî ra ke ganî bêrê averberdene est ê û erjnayîşê xo yê derheqê kêmanîyan de pey de verdayî.
Eşkerayî de bale ame antene ser o ke aştîya domdare tena bi serûberkerdişanê huqûqê cezayî nêyena temînkerdene û ganî proses bingeyê serdestîya huqûqî, zelalîye, edaletê komelkî û demokratîkbîyayîşî ser o bêro rayraberdene.
Baroyan sewbîna veng da ke heq û azadîyê bingeyînî bêrê pêtkerdene û beşdarbîyayîşê heme beşanê komelî bêro temînkerdene.
Eşkerayîya hempare de wina ame îfadekerdene: “Caardişê prensîbê dewleta huqûqî ke hukmê qanûnî yê ke caardişî de eşkenê bibê sebebê şîroveyanê cîyayan, bêrê eşkerakerdene, hîrayîya ci bêro zelalkerdene û peymê objektîfî ke caardişêko seypê temîn kenê, bêrê dîyarkerdene. Ma erjnayîşanê xo yê derheqê hewanayîşê kêmanîyan de goreyê prensîbanê huqûqê unîversalî pey de verdanê; la ma no serûberkerdişo ke eşkeno haştîya menda ke welatê ma bi serran o waşta rê feyde bido, sey firsendêko tarîxî vînenê û prensîbî de piştî danê.”
