Merdimanê vîndîbîyayan ra Îhsan Acar o ke her hewte Amed de tewrê çalakîya seba aqûbeta vîndîbîyayan yena viraştene beno, derheqê prosesî de dîyar kerd ke aştî û yewîye Meydanê Koşûyolû ra derbaz bena û wina vat: “Ma vanê bêrê ma pîya nê prosesê aştî biresnê ser kewtene.”
Şubeyê Komeleya Heqê Merdiman (İHD) yê Amedî aqubeta kesê ke ameyê kiştene û vîndîbîyayene faîlanê inan ameyê pers kerdene , bi şîarê “Wa vîndî bêrê vînayene faîlî bêrê muhakemekerdene” Parka Koşûyolû ya qezaya Rezanê Amedî de her hewte çalakî virazenê.
Nê merdimanê vîndîbîyayan ra zî yew keyeyê Acarî yo. Ferdanê keyeyê Acarî Mehmet Salîm Acar o ke 20ê tebaxa 1994î de qezaya Bismilî ya Amedî de hetê kesanê ke xo sey polîs daye şinasnayene ra ame destbendkerdene û a roje ra heta ewro agahîyêke ey ra nêameyê girewtene.
Lajê Mehmet Salîm Acarî Îhsan Acar ke her hefte beşdarê çalakîya ke Amed de virazîyeno, derheqê “Qanûnê Çarçewa” ke 5ê tebaxe de Meclîsî rê ame pêşkêşkerdene û derheqê prosesê de ajansê ma rê qisey kerd.
Îhsan Acarî serê prosesê “Aştî û Komelê Demokratîk” de wina vat: “Nêzdîyê serr û nêm o ke prosesêk dest pêkerdo. Ma nê prosesê aştî ra zaf bawer ê; ma vanê prosesê aştî do birêso ser kewtene.”
‘Pêro welatan de ardena aştî bi vîyarte ra têrîameyîş bena’
Îhsan Acarî bale ante “Qanûnê Çarçewa” ser û wina dewam kerd: “Ma vatbî do qanûn de derheqê ma de zî qerarêk bibo. Çi heyf ke derheqê ma de tu qerar nêameyo dayene. Na yewe beno ke xemgînîyêke bîyaro meydan, reyna ma verê zî vatbî: Heta ke yew vîndbîyayeyê ma bimano, ma na xebata xo ya fek veranêdane. Aştî û yewîye Meydanê Koşûyolû ra, dayîkanê Şemeyî ra, mîyanê problemê keyeyanê vîndbîyayna ra vîyarena. Heta ke dewlete behsê vîyarteyê xo nêkero, vîyarteyê xo ra hesabêke nêdo û nêperso do senî behsê ameyoxî bikero, senî aştî bîyaro? Pêro welatan de ardena aştî bi vîyarte ra têrîameyîş bena.”
‘Ma nê prosesê pîya biresnê ser kewtene’
Îhsan Acarî vengdayişê meclîsê kerd û vat: “Şarî reyde biko nîqaşî, bêrê hesab pers bikerî. Qanûnanê ke Anqara de vejîyenê derheqê ma de çîyêk çin o. No şerm o, yanî bifikirîye 32 serrî yo ke dayîkî tîya feryad kenê, vanê ‘ma şînê xo biqedênê, êdî ma zî şêrê keyeyê xo de ronişî.’ Waştişê ma no yo, ma vanê bêrê ma pîya nê prosesê aştî biresnê ser kewtene. Serkewtiş bi yewîye bena. Lazim o dewlete nê arşîvan akero. Dewlet wa naye ra nêremo. Heta ke dewlete na berpirsîyarî ra birêmo, nêeşkena aştî bîyaro meydan.”
