Verfekê Wezaretê Karanê Teberî yê Îranî, Îsmaîl Beqaî vano ke dayîşûgirewtişê bi Umanî rê qonaxo peyîn de yo. La goreyê Îranî, normalbîyayîşê pêroyî yê Hurmuzî hema zî wedaritişê dorpêçê derya yê Amerîka rê girêdayeyo.
Hukmatê Îranî eşkera kerd ke dayîşûgirewtiş, bi Sultanê Umanî rê seba bi serûberkerdena derbasbîyayîşê keştîyan ê Neqebê Hurmuzî de xeylî aver şîyî û her di hetî zî nêzdî viraştişê pemaneke yê. Tehranî dîyar kerd ke na mesela de Washîngtonî reyde tu dayîşûgirewtiş nênê rayraberdiş û heme hewildayîşî bi Umanî rê yenê kerdiş.
Neqebê Hurmuzî, seba neqlîyatê petrol û gazî rayîrêko muhîm ê dinya yo. Nê semedî ra, her vurîyayîşêk, trafîkê derbasbîyayîşê keştîyan de, eşkeno tesîrêko gird bazarê enerjîye ser o bikero.
La, çimayê fermî ê Îranî vanê ke agêrayîşê şert û mercanê verênî, hema zî qerarê Amerîka rê girêdayeyê. Goreyê înan, heta ke Washîngton dorpêçê derya yê sînoranê Îranî ser o nêwedarno, şertê derbasbîyayîşê Hurmuzî nêvirazênê.
Eşkerayîya hempare hedre bena
Verfekê Wezaretê Karanê Teberî ê Îranî, Îsmaîl Beqaî, qiseyêke de, ajanso fermî IRNA’yî de vat ke her di welatan rayîrê derbasbîyayîşî û koordînatanê ey ser o pêkerdo û wina vat: “Eke hetê hîrêyînî prosesî de astengî nêvejê, eşkerayîya hempare ê her di welatan nika qonaxo peyîn ê hedrekerdişî de yo.”
Sewbîna wat ke Hurmuzî de şertê ewleyî hema zî baş nêbîyî. Goreyê ey dorpêçê derya ê Amerîka sînaroanê Îranî ser o û çalakîyanê bînan ê leşkerî hem zî sebebê ewîlin ê alozbîyayîşê herême yê.
