Madeyê teklîfê qanûnî yê bi nameyê “Qanûnê Derheqê Pêtkerdişê Piştîdayîşê Mîlî û Pêameyîşê Komelkî de” ameyî eşkerakerdene.
Serekê Grûba AKPyî Abdullah Gulerî meclîs de derheqê qanûnê çarçewa yo ke sey ‘’Pêşnîyazê qanûnî yê bi nameyê “Qanûnê Xurtkerdişê Paştdayîşê Mîlî û Pêameyîşê Komelkî” yeno namekerdene, eşkerayîye daye.
Gulerî vat verkar bi îmzayanê 360 wekîlan Serekîya Meclîsî rê ame teqdîmkerdene.
Verkar badê Serekîya Meclîsî û Komîsyonê Edaletî yê Meclîsî do bêro Heyetê Pêroyî yê Meclîsî û badê ra bibo qanûn.
“Teklîfê Qanûnê Derheqê Pêtkerdişê Piştîdayîşê Mîlî û Pêameyîşê Komelkî de” wina yo:
Meqamê Tesbît û Teyîdî: Texmîn beno ke hetê dezgehanê asayîşî ra bêro tesbîtkerdene û hetê Heyetê Asayîşê Mîlî ra bêro teyîdkerdene ke rêxistine bi heme awanîya xo ya rêxistinkî û heme elamananê xo estbîyayîşê xo yo fîlî qedênayo û bêçek bîya.
Pêroyîya ci: Qanûn nê sûcan gêno xo mîyan: awankerdiş yan zî îdarekerdişê PKK/KCKyî, endambîyayîşê rêxistine, bi zanayîş û bi waştiş hetkarîkerdiş û propagandakerdişê rêxistine; sewbîna sûcê ke çarçewaya aktîvîteya na rêxistine de ameyî kerdene û sûcê Qanûnê Numre 6415î yê Derheqê Vernîgirewtişê Fînansekerdişê Terorîzmî de ke seba na rêxistine ameyî kerdene.
Teberê Pêroyîye: Cipersayîş û taqîbkerdişê sûcê kiştişê bi qestî ke çarçewaya aktîvîteya rêxistine de ameyî kerdene û sûcê ke verê tarîxê 01.06.2005î ameyî kerdene û cezaya hepsê hete-heta yan zî cezaya hepsê heteheta ya girankerde wazenê, teberê pêroyîya qanûnî de yê.
Cipersayîş û taqîbkerdiş: Erjnayîşê derheqê kesanê ke kewenê pêroyîya qanûnî de, do hetê merceyan ra ke heta nika cipersayîş û taqîbkerdiş kerdo, bêrê kerdene. La ame serûberkerdene ke muracatê seba feydegirewtişê nê qanûnî eşkeno serdozgerîyanê komare yê cayê ke merdim tede yo yan zî dezgehê ke hetê Heyetî ra wezîfe ameyo dayene, ci rê bêro kerdene.
Taloqkerdişê cipersayîş û taqîbkerdişan: Sûcê ke sînorê înan o corên 15 serrî yan zî kêmêr cezaya wazenê, 5 serrî; sûcê ke 15 serran ra vêşêr cezaya hepsî, cezaya hepsê hete-heta yan zî ya hete-heta ya girankerde wazenê, 10 serrî, cipersayîş û taqîbkerdişî yenê taloqkerdene.
Di hewteyan de rayîrê muracat û îtîrazî yê vera qerarî akerde yo.
Tedbîrê pawitişî yê tepiştiş û çimdarîya adlî yê derheqê sûcan de ke do qerarê taloqî bidîyo, eke şertê ci bibê, do bêrê hewanayene.
Derheqê dosyeyan de ke cigêrayîşê rayîrê qanûnî de yê, do qerarê xirabkerdişî bêro dayene û hetê mehkemeya dereceya verêne ra qerarê taloqî bêro dayene. Eke wexto ke ame dîyarkerdene, bê sûckerdiş bivîyaro, do qerar bêro dayene ke hewceyîya taqîbkerdişî çin a yan zî dewa kewta.
Taloqkerdişê cezayan: Cezaya hepsî ya ke pêro pîya 15 serrî yan zî kêmêr a, 5 serrî; cezaya hepsî ya ke pêro pîya 15 serran ra vêşêr a, cezaya hepsê hete-heta yan zî ya hete-heta ya girankerde, 10 serrî, bi qerarê hakimê caardişî do bêro taloqkerdene; rayîrê îtîrazî akerde yo.
Eke wextê taloqî bê sûckerdiş bivîyaro, cezaya ke ameya dayene, do sey caarde bêro hesibnayene.
Vîyartişê wextî: Wextê taloqî de wextê vîyartişê dewa û ceza nêhesibîyenê.
Kêmanîyê heqan: Qerarê taloqî do hetê Heyetî ra demkî bêrê erjnayene. Eke Heyet hewce bivîno, do hakimîya cezaya sulhî, mehkeme yan zî hakimîya caardişî ra biwazo ke kêmanîya heqan ke bi sebebê cipersayîş, taqîbkerdiş yan zî mehkumîyetî virazîyaya, bi heme netîceyanê xo bêro hewanayene.
Seba qeraranê taloqî yê 5 serran ganî tarîxê dayîşê qerarî ra 2 serrî û seba qeraranê taloqî yê 10 serran ganî hîrê serrî vîyarte bê.
Taqîb, koordînasyon û caardiş: Heyeto ke serekîya Cagirê Serekkomarî de Wezîrê Edaletî, Wezîrê Karanê Teberî, Wezîrê Karanê Zereyî, Wezîrê Pawitişê Mîlî, Sekretero Pêroyî yê Serekkomarîye, Serekê Teşkîlatê Îstîxbaratî yê Mîlî û Sekretero Pêroyî yê Heyetê Asayîşê Mîlî ra yeno meydan, do taqîb û erjnayîşê caardişê qanûnî bikero.
Texmîn beno ke koordînasyonê Heyetî hetê Sekreterîya Pêroyî ya Serekkomarîye ra bêro kerdene.
Bi awankerdişê Komîsyonê Çimdarî yê Meclisê Girdî yê Miletî yê Tirkîya (17 endamî) do aktîvîteyê çarçewaya nê qanûnî bêrê çimdarîkerdene.
Teslîmkerdiş û bêçekbîyayîş: Texmîn beno ke derheqê muameleya qeydkerdişî de agahîname bi girewtişê fikrê dezgehanê asayîşî hetê Wezîrîya Pawitişê Mîlî û Wezîrîya Karanê Zereyî ra bi hemparî bêro hazirkerdene.
Wextê muracatî: Ganî badê ke Qerarê Heyetê Asayîşê Mîlî Rojnameyê Fermî de bêro weşanayene, şeş aşman de seba îstîfadekerdişê nê qanûnî muracatêko nuştekî bêro kerdene.
