Parlamentoya Tirkîya de liv û têgêrayîşê qanûnê çarçewa vizêrî ra heta ewro zaf zêde bîyê. AKP’yî Meclîs de heyetê DEM Partî û MHPî reyde pêvînayîş viraşt. Yena pawene ke verkarê qanûnê çarçewa ewro partîyanê sîyasî rê bêro erşawitene û siba zî bêro verê destê Serekîya Meclîsî.
Parlamentoya Tirkîya de trafîkê pêvînayîşan û şîyayîş û ameyîşê serê qanûnê çarçewa de vizêrî ra heta nika zaf zêde bîyê. Vizerî heta nêmeyê şewe pêvînayîşe serê verkarî dewam kerd. Serekê Grûba AKP’yî Abdullah Guler û Serekwekîlê Grûba AKP’yî Abdulhamît Gul derheqê qanûnê çarçewa de DEM Partî û MHP zîyaret kerdî. Endamê Heyetê DEM Partî Faîk Ozgur Erol, Cagirê Hemserekanê Pêroyî yê DEM Partî Ozturk Turkdogan, Hemverfeka HDKî Meral Daniş Beştaş û parlamentera DEM Partî ya Şirnexî Newroz Uysal Aslan heyetê AKPî reyde kom bîyî. Badê kombîyayîşî tu eşkerayî nêame dayene.
Heyetê AKPî badê zîyaretê DEM Partî, Cagirê Serekê Pêroyî yê MHPî Fetî Yildizî reyde pêvînayîş viraşt. Dimayê pêvînayîşî Fetî Yildizî dîyar kerd ke mabênê înan de tu problem çinî yo û serê verkarî de pêameyê û tu astengî serê verkarî de çinî ya.
Verkar partîyanê sîyasî ra yeno erşawitene
Sewbîna heto bîn ra zî yeno pawene ke verkarê qanûnê çarçewa ewro partîyanê sîyasî rê bêro erşawitene û siba zî şêro verê destê Serekîya Meclîsî. Badê ra verkar do Komîsyonê Edaletî rê bêro erşawitene û heta roja 6ê tebaxe Heyetê Pêroyî yê Meclîsî de qanûn bêro vetene.
Badê ke verkar bibo qanûn do bi îmzakerdişê Serekkomarî bikewo pratîk. La do qanûn çi wext bikewo pratîk nêyeno zanayene.
