Bi pêşengîya MEBYA-DER’î yê Sêrte endamê Tevgerê Azadî ê ke tarîx û cayanê cîyayan de cuya xo ra bîyî, qezaya Misirce ya Sêrte de ameyê vîrardene û seba înan mewlûd ame dayene. Parlameterê DEM Partî, Omer Ocalan tewrê vîrardişê bi û wina vat: “Sîyaseto ke ma ewro kenê bi saya têkoşînê şehîdan o.”
Bi pêşengîya MEBYA-DER’î yê Sêrte 12 endamê Tevgerê Azadîya Kurdan ke tarîx û cayê cîyayan de şehîd bîyî, Keyeyê Şînî yê Sirri Sureyya Onder o ke Taxa Kendalî ya qezaya Misirce ya Sêrte de ameyê vîrardene û seba înan mewlud ame dayene. Parlamentera DEM Partî ya Sêrte Sabahat Erdogan Saritaş, Parlamenterê DEM Partî yê Riha Omer Ocalan, Hemşaredarê merkezî û qezayan, rayberê partîyanê sîyasî ê Merkez û qezeyan, sazgehê sîvîlî yê komlekî û xeylî kesî tewrê programê vîrardişî bîyî. Fotografê şehîdan bi renganê kesk, sûr û zer ameyê xemilnayene.
Girseyo ke tewrê programê vîrardişî bîyî, verê ke derbasê keyeyê şînî bibê rayra şîyî û û wextê rayra şîyayîşî de bêmaben sloganê “Şehîdî nêmirenê” û “Biciwîyo Serek Apo” ameyê vatene. Badê cû girse derbasê keyeyê şînî bi û seba kesanê ke têkoşînê azadîya Kurdîstanî de şehid bîyî, deqîqayêk rêz ame girewtene. Girse bade rêz girewtişî reyna sloganê “Şehîdî nêmirenê” û “Biciwîyo Serek Apo” vatê. Dima ra dua kerd û sînevîzyono ke seba şehîdan amebi hedrekerdene, ame mojnayîş.
‘Ma do pey şopê heme şehîdanê Kurdîstanî de bi’
Parlamenter Sebahat Erdogan Saritaş ke tewrê programê vîrardişê şehîdan bîbî wina qisey kerd: “Ma çiqas pesnê şehîdan bidi zî reyna kêm maneno. Şarê kurdî xeylî bedêlî girdî dayê û hema zî danê. Ma şexsê heme embazanê de, tîya soz danê ma do pey şopê heme şehîdanê Kurdîstanî de bê.”
‘Ganî ma sîyasetî de şerêko gird bikerê’
Parlamenter Omer Ocalan, programê vîrardişê de vat ke Tevgerê Azadîya Kurdîstanî bi bedêlanê giranan resaya na aste. Omer Ocalanî dîyar kerd ke Abdullah Ocalan 27 serrî yo ke zîndan de yo û PKK “Partîyê şehîdan” a û têkoşînê 50 serran, kurdan çar perçeyê Kurdîstanî ardê têhet û nika qonaxêka newe yê sîyasî dest pêkerdo. Sewbîna Omer Ocalan vengdayîş kerd ke têkoşîn warê sîyasetî de bi hêzêr bêro domnayene.
‘Ma do têkoşînê înan bidomi’
Omer Ocalan dewamê qiseyê xo de dîyar kerd ke nika zî çapemenîyê tirkan de xeylî nîqaşî yenê kerdene û bale ante ke çimeyê dewlete vane; do kurd û têkoşînê kurdan gird bibo û peynîyê qiseyê xo ard: “Senîn erjê her milete estê, elbet ê kurdan zî estê. Heqê her milete çi bo, ê kurdan zî o yo. Nika ma ser o şerê psîkolokî yeno cedrene. La Serektî wazeno rayîrêko newe bido awankerdene. Sey miletêk ganî ma xo vîr ra nêkerê ke sîyaset û têkoşîn rojane yenê vuryayîş. Ganî ma her îhtîmalî verê çiman de bigrê. Kurd aşiqê şerî nîyo. Wina bibi ke rayîr kurdan ver amebi girewtene û kurdan çek girewt. Ma do ala heme şehîdan berz bikerê. Embazanê ma yê zindanan xeylî rayan vato; ma seba şer zî û seba aştîye zî hedre yê. Ma do seba aştîye bixebitê, la wexta bela amî verê berê ma zî ma do xover bidi. Serê Serekê ma û heme keyeyanê ma sax bo. Em ê doza wan bidin meşandin. Ma do têkoşînê înan bidomi.”
Nasnameyê şehîdan ke seba înan mewlûd ame dayîş û ameyê vîrardene wina yê: “Rêzan (Mehmet Baran) 2000 Heftanîn, Hasan (Mehmet Kûtlûk) 1997 Botan, Berîvan (Hasîbe Karataş) 1994 Êlih Hezo, Çekdar (Dervîş Sag) 1996 Sêrt, Nûrhak (Îhsan Akay) 1992 Şirnex, Berçem (Leyla Kaplan) 1992 Heftanîn, Saîd (Tûran Yorûlmaz) 1993 Zagroz, Zerdeşt (Mûzzafer Çelîk) 1998 Botan Çirav, Amed (Zahîr Yon) 1993 Botan Mişar, Demhat (Yilmaz Çelîk) 1999 Wan Şax, Selîm (Kasim Sag) 1989 Botan Gabar, Ahmet (Esad Kaya) 1995 Êlih Qubîn.”
Peynîyê programî de dengbêj Salihê Qubînî seba şehîdan kilamî vatê.
