Programê 58. yê Festîvala Kultur û Hunerî yê Tetwanî ke do 10 rojî dewam bikero, dîyar bi. Festîvale de, konseran ra hetanî panelan, nawitgeh û tîyatroyî ra hetanî fuarê kitaban xeylî çalakîyê erjayeyî ca gênê.
Programê 58. yê Festîvala Kultur û Hunerî yê Tetwanî ke do mabenê 31ê temmuze û 9ê tebaxa 2026î de bi slogan ‘Tetwan de kultur esto, huner esto, ma estê’ bêro viraştene, dîyar bi. Festîvale de, konseran ra hetanî panelan, nawitgeh û tîyatroyî ra hetanî fuarê kitaban xeylî çalakîyê erjayeyî ca gênê. Sewbîna rayîrşîyayîşê xozayî û şovê Stand Up’îzî programê festîlave de ca gênê.
Festîvale, 31ê temmuze de roja înê saete 18:30î de bi rayîrşîyayîşê festîvale û performansê grûbê Erbaneyaî dest pêkena. Şewa ewiline saete 20:00î Warê Çalakî yê Qeraxî de bi beşdarîyê hunermend Şahê Bedo, Neslîhan Edîş û Serhedo konsereko gird yeno viraştene.
Çarçewaya festîvale de çalakîyê erjayeye û tîyatro zî estê:
*1ê tebaxe de vernîya Yaşam AVM’yî de Nawitgehê Komunê Fotografan yê Aryenî yeno akerdene û do hetanî peynîya festîvale ekerde bimano.
* Kayê ‘Her dewêk kayêkî’ ê Tîyatroyê BKM Arsen Paladov 1ê tebaxe de Taxa Esentepe û 2yê tebaxe de zî Taxa Karşîyaka saete 14:30î de vejîyenê vernîya tîyatroheskerdoxan.
*Fuarê kitaban 5ê tebaxe saete 11:30î de vernîya Yaşam AVM’yî de beranê akeno. Xeylî weşanxaneyê naskerde yê sey; Lîs, Nûbihar, Zarg, Sîtav, Luvî, Lîberta, Dara, Payîz, Avesta, Aram, J&J, Ar, Aryen, Belkî, Morî, Do û Erda tewrê fuarê benê.
Festîvale de seba babetanê edebîyat, ziwan û komelî panelê taybetî ameyê hedrekerdene:
*3ê tebaxe de panelê bi babeta ‘Tedaya Kulturî ya Nêasayene’ û ‘Rêbazê Newe û Awankerdişê Kulturî’ do bêrê viraştene.
*5ê tebaxe saete 14:30î de Konservatuarê Şaredarîya Tetwanî de panelê ‘Tîryakî-Made yê kungkerdişî ser o’ do bêro viraştene.
*Mabenê 6-9ê tebaxe de mabenê saetanê 16:00 û 17:00î de ‘Edebîyat û Ziwan’, ‘Terzê Vatişî û Kulturê Kurdkî’, ‘Tarîx û Ziwan û Edebîyatê Kurdkî’ û ‘Têkîlîyê Wendox-Nuştox û Termê Îqtîdarî’ ser o bi beşdarîya xeylî nuştox û cigêrayoxan do panelî bêrê viraştene.
Dîwanê Dengbêjan û Şewê Konseran
Festîvale de xeylî programê muzîkî yê zafrengînî estê. 4ê tebaxe de Parkê Baxçeyê Miletî de Dîwanê Dengbêjan (Xalîde, Evîn Sindî, Mehemedê Serhedî) yeno ronayene. Her şandî saete 20:00î de Warê Çalakî yê Peravî de do konserê virazî:
31ê temmuze de: Şahê Bedo, Neslîhan Edîş û Serhedo
1ê tebaxe de: Rûken Yilmaz, Mehmet Atli, Koma Agirê Jiyan
2yê tebaxe de: Peyal, Delîl Dîlanar
4ê tebaxe de: Koma Rengîn, Cevdet Bagca, Koma Agirê Zerdeşt
5ê tebaxe de: Eylul Nazlier, Murat Demîr, Siya Şevê
6ê tebaxe de: Servet Kocakaya, Ayfer Duzdaş, Bajar
7ê tebaxe de: Grûbê Govendê yê Cinîyan yê Arjînî, Mizgîn Turan, Tara Mamedova
8ê tebaxe de: Serdar Canan, Kamkars
9ê tebaxe de: Koma Amed, Îlkay Akkaya
Eynî wextî de 7ê tebaxe de geştê Kraterê Nemrûdî û di 8ê tebaxe de şovê Stand Up’î yê ‘Peynîya Peynî’ yê Tîyatroyê Şaristanê Amedî programî de ca gênê. Festîvale, 9ê tebaxe de bi konserê Koma Amed û Îlkay Akkaya qedêna.
