Qerargehê Merkezî yê Xatemul Enbîyayî eşkera kerd ke eke Artêşa Amerîka hêrişê merkezanê nukleerî bikero, ê do bi şîdet cewab bidê û şer do bêro hîrakerdene.
Qerargehê Merkezî yê Xatemul Enbîyayî yê Îranî eşkerayîyêk vila kerd û ard vîr ke Amerîka tehdîdê hêrişkerdişê merkezanê nukleer û hesasan ê Komara Îslamî ya Îranî kerd.
Eşkerayî de ame vatene ke eke Amerîka derbasê qonaxêko nemeşru bibo, ê do naye sey hîrakerdişê şerê herêmî bihesibnê û wina ame vatene: “Heme menfeetê Amerîka, mutefîq û terefgirê ê welatê serewedaritox û şerwazî, do bibê hedefê hêrişanê girdan ê Hêzanê Çekdaran ê Komara Îslamî ya Îranî.”
Serekê Amerîka Donald Trumpî vizêr eşkera kerdbi ke muhtemel o ê ‘demêko nêzdî de’ hêrişê nê cayan bikerê ke Tehranî uca de teçhîzat û madeyê nukleerî nimitê.
Trumpî eşkera kerdbi ke nê hereketan ra haydar ê, bi îhtîmalêko pîl ê do demêko zaf nêzdî de nê herêman piro bidê û wina vatbi: “Îran nêşino verba ma de tu çîyêk bikero. Bi hawayêko normal ez çîyanê nê qeydeyî nêvana, la eger mi hîs bikerdêne ke ê eşkenê seba pawitişê nê cayan çîyêk bikerê, mi do qet ney nêvatêne. La ez reyna vana, ma do zaf bilez bidê nê herêman ro .”
