Bi serekîya MEBYA-DER, TUAY-DER û Komeleya 78î, gora xoverdayoxanê Rojeyê Mergî yê Gird ê Zindanê Amedî ra Alî Çîçekî ameye zîyaretkerdene.
Komeleya MEBYA-DER û TUAY-DER a Amedî, Hewldana 78î, serrgêra Rojeyê Mergî yê Gird ê 14ê Temmuze de, vernîyan zindanî de eşkerayîyêka çapemenî daye. Eşkerayî de ame dîyarkerdene ke ganî Wezaretê Kulturî waştişê komelî bîyaro ca û Zindanê Amedî bikero ‘Muzeya Vîrê Merdimîye.’
Dimayê eşkerayî, Goristanê Yenîkoyî yê qezaya Rezan a Amedî de gora xoverdayoxanê 14. Temmuze ra Alî Çîçekî ameye zîyaretkerdene. Tîya de ewilî seba yadkerdişê kesanê ke canê xo dayo, deqîqeyêk rêze ameya girewtiş.
Tîya de endamê Komeleya 78î Ganî Alkanî qisey kerd.
‘PKKyî xoverdayîş musna ma, teslîmîyetî qet nêmusna ma’
Ganî Alkanî derheqê xoverdayîşê 14ê Temmuze û vîrameyîşanê xo yê Alî Çîçek û Mehmet Hayrî Dûrmûşî de wina vat: “Alîyî vatbi,‘PKKyî xoverdayîş musna ma, teslîmîyetî tu wext nêmusna ma. Seba ney ez zî kewena rojeyê mergî û êdî nêna mehkema.’ Ma zî vanî, embaz Alî, o fîkrê şima, o vindertişê şima û a dara ke şima bi ruhê xo awe daya, nika cayo tewr xorîn ê Kurdîstanî de ya.”
Dima ra ke qiseykerdiş qedîya, beşdaran tîlîlî kerd, sloganê ‘Şehîd namirin’ vat û nayî gora Alî Çîçekî ser o qurnefîlî ronayê.
