Kitabê nuştox Faysal Ozdemîrî yê bi nameyê “Rûpelên Binaxkirî” û “Evîna Rojdayê” serra 2016î de hetê Serdozgerîya Komarî ya Êlihî ra seba ke tede çekuya “Kurdîstan” vîyarta, ameyê qedexekerdiş. Nuştox Faysal Ozdemîrî derheqê nê qedexeyî de wina vat: “Mesela polîtîk nîya; mesela na ya ke nê kitabî bi ziwanê Kurdkî ameyî nuştiş, o semed ra ameyê qedexekerdiş.”
Faysal Ozdemîr serra 1967î de qezaya Misircê ya Sêrtî de ameyo dinya. Dima ra ke medreseyan de waneno û îcazetê melatîye gêno, dewan de melatîye keno. Serranê 90î de mîyanê xebatanê polîtîkan de yeno girewtiş û 10 serrî zindan de maneno. Nuştoxo ke zindan de zafêrî ziwan û edebîyatê Kurdkî ser o xebitîyayo, binê tesîrê Ehmedê Xanî, Melayê Cizîrî, Feqîyê Teyran û Cegerxwînî de maneno û sond weno ke êdî tu ziwanê bînî reyde nênuso.
‘Ziwanê Kurdkî qedîm o û nêqedîno’
Faysal Ozdemîrî dîyar kerd ke ziwanê Kurdkî ziwanêko zaf kehen o û vat ke 12 hezar serrî yo na herre ser o pê nê ziwanî qisey beno. Nuştoxî bal ant polîtîkayanê asîmîlasyonî yê serranê peyênan ser o û vat: “Semedê welatperwerîya ma serranê 90î de ez ameya girewtiş. Serra 1994î de mi kitabêkê Yaşar Kemalî ya bi Tirkî wende. Mi dî ke hîkayeyê kalikanê ma girewtî, bi Tirkî nuştî û kerdî malê Tirkan. Kam ke kilam, hîkaye û kulturê Kurdkî bi ziwanêko bîn binuso, o dizd o. Ez zî zindan de kewta mîyanê cehdan ke nê hîkayeyî sey belgeyî bimanî û biresê miletê ma. Kitabê min o ‘Rûpelên Binaxkirî’ de nê hîkayeyê kalikan est ê.”
‘Seba çekuya Kurdîstanî 9 serrî qedexe mend’
Faysal Ozdemîrî dîyar kerd ke kitabê ci yo hîkayeyan reyde tu eleqeyê polîtîkayî çinbî labelê tena seba ke tede çekuya Kurdîstanî ameybî nuştiş, 9 serrî qedexe menda. Faysal Ozdemîrî derheqê romana xo ya “Evîna Rojdayê” de zî wina vat: “Na romane zî hîkayeya di Rojdayan qisey kena; yew Rojdaya tarîxî ya ke Osmanîyan sereyê ci birnayo, yew zî Rojdaya nê wextî ya ke seba eşqê welatê xo hetê dewlete ra ameya kiştiş.”
Nuştox Faysal Ozdemîrî qiseykerdişê xo bi nê vatişan qedêna: “Ziwanê Tirkî verê ziwanê Kurdkî de ziwanêko lewaz û viraşte yo. Însanê ke lewaz î, her wext tersenî û wazenî yê bihêzî qedexe bikerê. Labelê ziwan ruh û zerrîya komelî gandar tepêşeno. Senî ke darek bê awe bimana ziwa bena, zerrîya merdimî zî bê ziwan wina vîndî bena.”
