KCKyî şexsê xoverdayoxanê 14ê temmuze de heme şehîdê zîndanan bi minnet û rêz yad kerdî û vat: “Ma bawer kenê ke ma do Kurdîstanêko Azad, Tirkîyaya Demokratîke û Rojhelatêko Mîyanên o Demokratîk ke hesretê înan bî, bi felsefeyê cuya înan bîyarê ca.”
Hemserekîya Konseya Îcrayî ya KCKyî vat: “Serrgêra 44. ya xoverdayîşê Rojeyê Mergî yê Girdî yê 14ê temmuz a. Nê xoverdayîşê tarîxî de ke ma sey ‘Roja Rûmetî’ mana danê ci, Kemal Pîr, M. Hayrî Durmuş, Akîf Yilmaz û Alî Çîçek şehîd bîyî; ma înan bi minnet û rêz yad kenê û sozê xo yê caardişê cuyêka azade û demokratîke reyna newe kenê.”
Eşkerayîya KCKyî de ame vatene: “14ê temmuze 1982î hetê tarîxê Kurdîstanî ra rojêka zaf muhîm a. Darbekerdoxê faşîstî yê 12ê êlule ke seba jenosîdkerdişê şarê kurdî ameyî îqtîdar, 14ê temmuze de hetê îdeolojîk-polîtîkî ra bin kewtî.
Darbeya leşkerî ya faşîste ya 12ê êlule hedef kerdbî ke têkoşînê azadîye yê şarê kurdî û têkoşînê azadî, demokrasî û sosyalîzmî yê şaranê Tirkîya bêveng bikero. Apoyijê ke serranê 1970î de vejîyayî sehneyê tarîxî, vera kolonyalîzmê jenosîdkerî yê dewleta tirke beyraqa serewedartişî hewana. Apoyijan Kurdîstan de averşîyayîşêko lezgîn mojna û 27ê teşrîna peyêne 1978î de bîyî partî. PKKyî demêko kilm de gelek cayanê Kurdîstanî de kolonyalîzmo jenosîdker leqna.
Amancê dewleta tirke ke wazeno Kurdîstanî bikero warê vilabîyayîşê neteweyîbîyayîşê tirkan, her roj darbe werdêne. 12ê êlule 1980î de seba ke vernîya nê averşîyayîşî bigîrê û kolonyalîzmê jenosîdkerî newe ra pêt bikerê, darbeya leşkerî ya faşîste ame caardene. Bi na darbe hedef kerd ke PKK bêro çinkerdene. Bi hezaran qadro, sempatîzan û tarafgirê PKKyî işkenceyanê dergan ra vîyartî û zîndanan de ameyî pirrkerdene; wazîya ke bi işkenceyanê giranan tepişteyî poşman bibê û bibê îtîrafkar. Bi no hewa tena PKK betonê zîndanan de nêro defnkerdene, îradeyê şarê kurdî zî bişikîyo, kurdîtîya xo ra bêro fekverdayene û bêro jenosîdkerdene.
Xoverdayoxanê rojeyê mergî yê 14ê temmuze cuya xo eşte meydan ke nê amancê jenosîdî veng bikerê û vera polîtîkaya lezkerdişê jenosîdî teslîmîyetê zîndanan ser o vat ‘bes o’. Çunke eke vera nê amancê bêbextî nêameyêne vindertene, ameyoxê şarê kurdî do biameyêne tarîkerdene û Kurdîstan de sera ra heta peynî bi polîtîkaya jenosîdî tirkkerdiş do biameyêne caardene. Gama ke ma 14ê temmuze yad kenê, ganî ma na raştîye rind fehm bikerê û îzah bikerê. Îdrakê ‘tena xoverdayîşê vera işkence bî’ beno sebeb ke amancê kolonyalîstanê jenosîdkeran ê Zîndanê Hûmara 5. ya Diyarbekirî bêrê nimitene.
Behsê işkenceyan kerdene, vatene ‘ez vera işkence de ya’ la amancê eslî yê nê nîzamê işkence eşkera nêkerdene, do vera nê xoverdayoxan bibo neheqîyêka girde. Xoverdayoxanê 14ê temmuze amancê bêbextî yê jenosîdkerî yê dewleta tirke zaf rind dî, coka cuya xo eşte meydan û xoverdayîşo tewr gird ê tarîxê Kurdîstanî ard ca. No xoverdayîş tam wextê xo de ame kerdene. Eke rojeyê mergî yê 14ê temmuze nêbîyêne, ma do ewro bidîyêne ke jenosîd Kurdîstan de çiqas berz vila bîyo, çunke înan do bi teslîmîyetê ke zîndan de virazenê, muhîtêko sîyasî û psîkolojîk bidîyêne ke jenosîdî lezêr aver berê.
Xoverdayoxanê 14ê temmuze tena vera planê lezkerdişê jenosîdî nêvat ‘bes o’; bi felsefeya cuye û têkoşînî ke viraşte, qewetê têkoşînî zî vet meydan ke şarê kurdî cuyêka azade û demokratîke bigîro. Eke şêwazê xoverdayîş û serkewtişî yê şert û mercanê tewr zehmetan nêviraştêne, destkewteyê 50 serranê peyênan ê çar parçeyanê Kurdîstanî nêameyêne ca. Nê hetî ra felsefeya cuye û têkoşînê Kemal Pîrî ya ‘Ez cuye ra qaso ke seba ci bimirî, hes kena’ ewro zî ma rê rayîr mojnena.
Projeyê haştî û komelê demokratîkî zî bi na felsefeya cuye û têkoşînî eşkeno bireso serkewtişî. Na felsefe de çîyêko sey zehmetîye çin o; zehmetîyî sebebê têkoşînkerdiş û serkewtişî yê.
Ma şexsê xoverdayoxanê 14ê temmuze de heme şehîdanê zîndanan reyna bi minnet û rêz yad kenê û bawer kenê ke ma do Kurdîstanêko Azad, Tirkîyaya Demokratîke û Rojhelatêko Mîyanên o Demokratîk ke hesretê înan bî, bi felsefeya cuye û têkoşînê înan bîyarê ca.”
