Endama ÇHD’yî Dîlan Eskî bale ant destbendkerdiş û girewtişan ser o ke semedê zîrweyê NATO’yî ameybî kerdiş û vat: “Kesê ke ameyê girewtiş seba ke tewrê çalakîyanê vera NATO’yî nêbê, bi îşkenceyî ameyê destbendkerdiş û girewtiş.”
Stenbol de bi seyan kesî bi îhtîmalê ‘Eşkenê çalakîye bikerê’ ameyê destbendkerdiş. Qiseykerdişê telefonî yê Sereka Şubeya Komela Huqûqnasanê Hemdem (ÇHD) ya Stenbolî Ezgî Onalan û endamê ÇHD’yî Yûnûs Emre ke Serekê Baroyê Stenbolî Îbrahîm Kaboglu reyde kerdbî zî sey ‘qiseykerdişê biguman’ ameyê vînayîş. Pereyê ke muwekîlanê înan erşawitê zî sey ‘neqilkerdişê pereyo biguman’ ameyo vînayîş. Kesê ke sereştişê keyeyan de bi îhtîmalê ‘eşkenê çalakîye bikerê’ ameyê destbendkerdiş, îqtîdarê AKP’yî, seba ke tu kes vera zîrweyê NATO’yî çalakî organîze nêkerê, bi seyan kesî destbend kerdê.
Operasyonê destbendkerdişî
15ê hezîrane de, Stenbol de operasyonêk ame viraştiş û 23 kesî ameyê destbendkerdiş, înan ra 21 kesî ameyê girewtiş.
26ê hezîrane de, Stenbol de 31 kesî ameyê destbendkerdiş, înan ra 19 kesî ameyê girewtiş. Mîyanê kesan de ke ameyê destbendkerdiş, mamoste, doktor û avûkatî zî est ê. Kesê ke ameyê girewtiş zî bi manayê ‘endamê rêxistine yê’ û ‘îhtîmal est o ke çalakî bikerê’ ameyê girewtiş.
29ê hezîrane çalakîya ciwanan de 89 ciwanî ameyê destbendkerdiş û badê îfadeyê ameyê veradayîş.
5ê temmuze de reyna operasyon ame kerdiş û Sereka Şubeya Komeleya Huqûqnasanê Hemdem (ÇHD) ya Stenbolî Ezgî Onalan zî tede tewr tay 16 kesî ameyê destbendkerdiş.
7ê temmuze de Kuçeyê Îstîklalî de tewr tay 10 kesî ameyê destbendkerdiş.
7ê temmuze de Kadikoy de bi desan ciwanî bi îşkence ameyê destbendkerdiş û polîsî destê ciwanekî şikit.
8ê temmuze de 25 kesî ameyê girewtiş.
Pêroyî Stenbol de bi seyan kesî ameyê destbendkerdiş, înan ra 54 kesî ameyê girewtiş.
Endama Şubeya Komeleya Huqûqnasanê Hemdem (ÇHD) ya Stenbolê Dîlan Eskî, derheqê destbendkerdiş û girewtişan de qisey kerd.
‘Waşt ke destbendkerdeyî bê avûkat bimanê’
Dîlan Eskî dîyar kerd ke kesê ke ameyê destbendkerdiş raştê îşkenceyê polîsan ameyê û wina vat: “Stenbol de sereştişê keyeyan de kesêk polîsê taybetî ra vano ‘Ez şîfreyê telefonê xo nêdana’. 5 polîsê taybetî hêrişê ciwanî kenê û bi îşkenceyê şîfreyê face ID (şifreyê rî) telefonê ey akenê. Rîyê îşkenceyî ra rîyê ê ciwanî binê gonî de maneno. Çalakîya 7ê hezîrane de Kadikoy de, polîs kesêko destbendkerde rê îşkence keno. Destê kesêkî a çalakî de hetê polîsan ra yeno şikitiş. Waşt ke kesê ke ameyê destbendkerdiş bê avûkat bimanê. Xora xeylî embazê ma sereştişê keyeyan û çalakîyan de ameyê destbendkerdiş.”
‘Seba ke çalakî organîze nêkerê bi seyan kesî ameyê girewtiş’
Dîlan Eskî îfade kerd ke xeylî embaz û muwekîlê înan ameyê girewtiş û wina dewam kerd: “Sereka Şubeya Komela Huqûqnasanê Hemdem (ÇHD) ya Stenbolî Ezgî Onalan û endamê ÇHD’yî Yûnûs Emre muwekîlê xo reyde sereştişê keyeyan de amebi destbendkerdiş û 8ê hezîrane de amebi girewtiş. Hewteyo verên endama ÇHD’yî ya Stenbolî avûkat Doga Încesu û endema ÇHD’yî ya Anqara Semra Demîr û Kurşat Bafra operasyonê NATO’yî de amebî destbendkerdiş û dima ra ameyê girewtiş. Reyna endama ÇHD’yî ya Stenbolî Ozge Ûsanmaz Anqara de ameye destbendkerdiş û bi qerarê kontrolê edlî ameye veradayîş. Kesê ke ameyê destbendkerdiş, sebebê tewrbîyayîşê çalakîyan înan ra ameyo persayîş. 55 serrî ver sosyalîst û şarî çalakîyê vera Fîloyê 6. û serra 2024î de çalakîyê vera Zîrweyê NATO’yî ameybî kerdiş. Nika çi cîyayî est ê? Ewro hema protesto nêameyê kerdiş şar yeno girewtiş. Girewtişê ewro bi manayê ‘endamtîya rêxistine’ ameyê caardiş.
