Rêxistina Heqanê Merdiman a Îranî eşkera kerd ke emser şeş aşmanê verênan de tewr kêmî îdamê 370 kesan ameyo teyîtkerdene.
Rêxistina Heqanê Merdiman a Îranî (IHRNGO) raporê xo yê derheqê dardekerdişanê Îranî de weşana. Goreyê raporî, dardekerdişî Îran de dimayê îcrakerdişê mehkûmanê sîyasîyan ke 18ê adare dest pêkerd, hêdî-hêdî zêde bîyî û dimayê adirbestê destpêkê aşma nîsane hîna lez bîyî. Aşma hezîrane de tewr kêmî 101 kesî ameyî dardekerdene.
Raporî de ame qeydkerdene ke şeş aşmanê verênan ê 2026î de hûmara dardekerdeyan tewr kêmî 370 ya û mîyanê dardekerdeyan de 9 cinî, 11 hemwelatîyê afganî, 2 hemwelatîyê îraqî, 33 beluc, 25 kurd û 9 ereb est bîyî. Ame îfadekerdene ke dardekerdişî ke ameyî teyîdkerdene, tira 188ê ci bi îdiaya sucê qetlî ceza girewtbi, 117 kesî bi sucanê ke tîryakî reyde girêdaye bîyê û 55 kesî zî bi sucanê emnîyetê neteweyî ameyî dardekerdene.
IHRNGOî hişyarî daye ke aşmanê ameyoxan de dardekerdişî do hîna zêde bibê û veng da ke komela mîyanneteweyî rewşa heqanê merdiman a Îranî, bi taybetî pêlê dardekerdişan ke bizêdîyê, biko babeta rojevî ya tewr verêne ya her tewir pêdîyayîşî ke îdareyê Îranî reyde bêro kerdene.
