Endamê Fermandarîya HSMyî Karayilanî, mîyanê nirxnayîşê xo yê derheqê serûberkerdiş û qanûnan de ke Tirkîya de yenê munaqeşekerdene, vat ke seba çareserîyêka menda ganî gamê şênberî bêrê eştene û pers kerd: “No qanûn do her çîyî esas bigîro?”
Endamê Fermandarîya Merkezê Pawitişê Şarî (HSM) Murat Karayilanî ke weşanêko taybet ê Stêrk TVyî de cewabê persanê rojnameger Delîl Ronahî da, aşma temmuze ra bigîre, ke tarîxê PKKyî de manayêka taybet a, heta Prosesê Haştî û Komelê Demokratîkî, tecrîdê ke Rayberê Şarê Kurd Abdullah Ocalanî ser o yo ra bigîr heta serûberkerdişê qanûnî yê ke Tirkîya de rojeve de yê, zaf war de nirxnayîşî kerdî. Karayilanî destnîşan kerd ke ê stratejîya sîyasetê demokratîkî de qerardar ê û îfade kerd ke seba averşîyayîşê prosesî ganî dewlete gamanê hiqûqî û sîyasîyan ke bawerî virazê, bierzo.
Heval Fuat sey arşîvê têgêrayîşê ma bî
“Aşma temmuze, têkoşînê ma de aşmêka muhîm a. Şehadetê heval Fuatî (Ali Haydar Kaytan) zî 3ê temmuze de qewimîya. Nê şehadetî manaya aşma temmuze zaf zêde kerde. Serrgêra heştine ya şehadetê ci de ez heval Fuatî bi minetdarî û bi rêzdarî ana vîrî û ez sozo ke ma dayo şehîdanê xo, newe kena. Senî ke seba pêro şehîdanê ma, ma do sozê hevalîye dayo heval Fuatî zî heta peynî do tira pabeste bimanê.”
Karayilanî destnîşan kerd ke Kongreya 12. ya PKKyî de qerarê feshî û qedênayîşê têkoşînê çekdarî ameyî girewtene û nê qerarî qetî yê. Vat ke stratejîya têgêrayîşî nika sîyasetêko demokratîk o, la eke bi amancê çinkerdişî hêrişêko leşkerî ma ser bêro, têgêrayîş eşkeno xo bipawo: “Eke bi metodanê şerê verênî biwazê ma çin bikerê, ma do verênî ra 3-4 qat hîna zêde cewab bidê.”
Karayilanî derheqê tecrîdê Rayberê Şarê Kurd Abdullah Ocalanî de vat ke 42 rojî yo tu heyet nêzdî nêbîyo û no tecrîdêko sîyasî yo. Destnîşan kerd ke bê Rayber Apoyî rayîr nêşino: “Rayber Apo sermuzakerekar o. Şarê kurdan eke pêşengê ci zindan de bo nêbeno xoser.” Vat ke vatişê ‘Rayber Apoyî çarçewaya qanûnî qebûl kerda’, zûr o û şerêko psîkolojîk o.
Karayilanî derheqê meseleya kurdan de vat ke na meseleyêka tarîxî û komelkî ya, bi resnayîşê ci meseleyêka ‘terorî’ nêbeno çareser. Destnîşan kerd ke eke çarçeweya qanûnî ya ke rojeva Tirkîya de ya, yew-hetî nêbo û her çîyî esas bigîro, do seba Tirkîya bibo firsendêko tarîxî. Vat: “Ma wazenê ma dewlete reyde pê bikerê, komare bikerê komarêka demokratîke û ma zî tede bibê. La ganî hetê muqabîlî zî wina nêzdî bibo.”
Karayilanî derheqê Rojhelatê Kurdistanî de vat ke peyê peymana Amerîka-Îranî dewleta Îranî rîyê xo çarna kurdan ser o, la şerêko mabênê kurdan û Îranî de do seba tu hetî feyde nêbo. Vat ke şarê kurdan şerê Amerîka-Îranî de het nêgirewt û ganî Îran zî problemanê xo bi rayîranê sîyasîyan çareser bikero.
Peynî de Karayilanî derheqê Konferansa Ziwanê Kurdî de vat ke qerarê ke ameyî girewtene, muhîm ê la ganî bibê pratîk. Veng da ke şar dormeyê sîyasetê Rayber Apoyî de hîna zêde yew bibo û destnîşan kerd ke şero taybet wazeno bawerî û dînamîzmê komelî zeîf bikero, coka ganî merdim baldar bo.
