Platformê Şîyar Be bi sloganê “Vera hişberî seba cuyêka azad û arame wirzê!” gamêka newa dîyar kerd û veng da heme temsîlakaranê komelî ke têkoşînêko hempar bikerê. Endamanê Platformî dîyar kerd ke vera nê siyaseta şerê taybetî, çareserî xelasîya şexsî nîya, awankerdişê komun û rêxistinbîyayîşî yo.
Platformê Têkoşînê Vera Tiryakî yê Şiyar Be bi sloganê “Vera hişberî sebacuyêka azad û arame wirzê!” Parka Koşuyolu ya qezaya Rezanî ya Amedî de eşkerayîya çepemenî daye. Parlamenterî, hemşaredarî, endam û temsîlkarê dezgehanê sivîlan, partîyanê sîyasîyan û xeylê kesî beşdarê eşkerayî bîyê. Eşkerayî de Gama ‘Wirzê!’ ameye eşkerakerdene û veng da heme parçeyanê komelî ke vera hişberî planê têkoşînêko pîya bêro amadekerdene.
Hemverfeka Platformî Gulşen Demîr û Endamê Platformî Helîm Barînî detayî na game ajansê ma reyde pare kerdî.
‘Madeyê hişberî amûrê şerê taybet ê’
Endama Platforma Têkoşînê Vera Madeyanê Hişberan Gulşen Demîr bal ant dama şuxulnayîşê madeyanê hişberan ser o û dîyar kerd ke Kurdîstan de emrê şuxulnayîşê madeyanê hişberî heta 7 serrî kewto û îfade kerd ke dewletê kapîtalîstî nê madeyan sey amûrê şerê taybetî şuxulnenê. Gulşen Demîr wina vat: “Dewletî nêwazenê ciwan û domanê kurdî bifikirî û zereyê xebatanê rêxistinî de ca bigîrê; nê semedî ra hişber, fihûş û qumar seba înan amûro tewr weş o.”
‘Ma do 4 taxanê ceribnayîşî de keye bi keye bigêrî’
Gulşen Demîr dîyar kerd ke înan sey dezgehanê Amedî nê platformî awan kerdo û înan sey ewil Amed de 4 taxê ceribnayîşî weçînayê û nê çîyî vatî: “Ma do nê taxan de ber bi ber bigerî, anketan virazî û tespît bikerî ka çend keye nê çîyî ra zerar dîyo. Badê anketan zî ma do bi piştgîrîya dezgehanê demokratîkan û dezgehanê kulturan, seba doman û ciwanan xebatanê kultur û perwerdeyî bidê destpêkerdene.”
‘Na game dewamê vengdayîşê Rayber Apoyî ya’
Endamê Platformê Şîyar Be Helîm Barînî zî bal ant polîtîkayanê şerê taybetî ser o û veng da komelî ke vera nê jehrî bi rêxistinî têkoşîn bikerî û dîyar kerd ke Platformê “Şîyar Be” nêzdîyê serr û nêm o xebatanê xo rayra beno û wina qisey kerd: “Na hamleya ma sey dewamê a game ya ke Rayber Apoyî 27ê sibats 2025î de dabî destpêkerdene. Çunke azadî û aştî tena babetê sîyasî nîyê, rasterast bi pakîya komelî zî elaqadar ê.”
‘Azadî bi komelêko polîtîk mumkin a’
Helîm Barînî dîyar kerd ke serranê peyênan de hêrişê şerê taybetî yê sey tîryak, fihûş û qumar Kurdîstan de zaf zêde bîyê û îfade kerd ke amancê nê siyasetî xerimnayîşê ameyoxê komelî yo û wina dewam kerd: “Ewro rotişê madeyanê hişberî sey çîyêko normal yeno mojnayene. Ganî azadîwazî nê halî qebul nêkerê. Îdiaya ma na ya ke azadî tena bi komelêko wayîrê exlaq û polîtîk mumkin a. No şero taybet astengîya tewr pîl a ke vernîya awankerdişê komelê demokratîkî de vindena.”
‘Dezgehî berpirsîyarîyanê xo nêanê ca’
Helîm Barînî da zanayene ke nê wextanê peyênan de xebatê înan sist bîbî labelê sey dînamîkanê komelî ê reyna ameyî têhet û lazimtî bi hamleyêka newe dîye û qiseykerdişê xo wina domna: “No têkoşîn tena bi hişyarkerdişî ser nêkeweno, ganî ma têbigêrê. Çi dezgehê sivîlî çi zî yê dewlete, ê ke berpirsîyarîya xo nêanê ca, ma do înan teşhîr bikerî. Badê erdlerzî Baglar de xeylê awanîya xeripîyayeyî bîyê cayê madeyaê hişberî. Dormeyê dibistanan de no jehr bi rehetî yeno rotiş û dewlete kontrol nêkena. Ma şaredarîyan zî rexne kenî, ganî parkê tarî û herimîyayeyî lez bêrê roşnîkerdene û rastkerdene.”
‘Çareserî rêxistinbîyayîş o’
Helîm Barînî peynî de bal ant xeberanê Ajansê Mezopotamya ser o ke derheqê çeteyanê ke ciwanan kenê hedef û dîyar kerd ke xelasîya şexsî mumkin nîya û vengdayîşê xo bi nê vateyan qedêna: “Kesê ke na xirabîye kenê zaf bi rêxistinkerde xebitîyenê; vera înan de ganî ma cepheyêko xurt awan bikerî. Xeylê merdimî aciz ê labelê tersenî. Ma veng danî şarê xo; Tax û kuçeyanê xo de komunanê xo awan bikerî, wayîrê dormeyê xo bivejî û vengê xo berz bikerî. Eke dezgehek karê xo kêm bikero, şêrê verê berê ci rexneyanê xo vajê.”
