AVAMED dewanê Amedî de welatîyan ra waşt ke awdayîşê baxçe û bostanan bi awa şebekeyî nêkerî û seba ewleyîya awa pake vengdayîşê hesasîyetî kerd.
Bi ameyîşê hamnanî şuxulnayîşê awe zêde beno. Çi heyf ke zafê welatîyan bi awa şimitişî baxçe û bostanê xo awe danî. Şuxulnayîşê awa şimitişî baxçeyan de bena sebeb ke çimeyê awe kêm bibî û zaf reyî zî seba çinbîyayîşî, awe yena birnayîş. AVAMED bi amancê şuxulnayîşê awa şimitişî ya teberê şimitişî û bêyî saete şuxulnayîşê awe, welatîyan û keyayê taxan agahdar kerdê.
Mudirîya Pêroyî ya AVAMED’î ya Şaredarîya Amedî ya Şaristanê Girdî, vera bi hawayêko zêde şuxulnayîşê awa şimitişî, dewanê Amedî de welatîyan ra waşt ke awe bi teserûf bişuxulnê û ame vatene ke ganî bêyî saete awe nêra şuxulnayîş.
Ganî awdayîş bi awa şimitişî nêro kerdiş
AVAMED agahdarkerdişî de welatîyan ra waşt ke baxçe û bostan bi awa şebekeyî awnêdê û awe teberê amancî de bi hawayêko zêde nêşuxulnê. Sewbîna AVAMED’î welatîyan ra waşt ke şuxulnayîşê zêde yê awe bi taybetî tay saetanê roje rîyê zêde şuxulnayîşî ra kêm bena, awa zafê keyeyan kêm herikîyena. Agahdarkerdişanê xo de AVAMED’î dîyar kerd ke çimeyê awe yê ke bilasebeb awe tira şona, ganî bilez bêrê viraştiş ke awe bilasebeb nêşêra. Sewbîna AVAMED’î keyayanê taxan ra waşt ke welatîyan hişyar bikerî ke awa şebekeyî bêyî saetan nêşuxulnê.
Awa qaçax yena kontrolkerdene
Ekîbê kontrolkerdişê awa qaçaxe qadan de kontrolan kenî. Ekîban welatî derheqê tespîtanê şuxulnayîşê awa qaçaxw de agahdar kerdî û welatîyan rê da zanayene ke şuxulnayîşê awa qaçaxe do rastê tespîtanê qanûnî bêro. AVAMEDî welatîyan rê da zanayene ke nê kontrolî seba ke awe bi hawayêko ewle û bêyî birîyayîşî bêra şuxulnayîşî, yenî kerdene.
Teserûf tesîrêko pozîtîf keno
Serekê Daîreyê Herêma 1ê a Karsazgehan Abbas Aslanî dîyar kerd ke germbîyayîşê hewayî reyde şuxulnayîşê awa şimitişî zî zêde beno û derheqê babete de nê çîyî vatî: “Awdayîşî baxçeyan ra bigîre heta herimîyayîşê tesîsatî, her tesarûfêko qijkek tesîrêko pozîtîf ewleyîya pêroyê şebekeyî keno. Şuxulnayîşê awa qaçaxî hem barê şebekeyî zêde keno hem zî barê aborî yê aboneyanê me yê qeydkerdeyan giran keno.”
Tewr peynî de AVAMED’î seba pawitişê çimeyanê awe û şuxulnayîşî vengdayîşê hesasîyetî kerd.
