Qubad Talebanîyo ke derheqê pêvînayîşê heyetê YNKyî yê Hakan Fîdanî reyde Anqara de eşkerayî da û dîyar kerd ke YNK nêbeno parçeyêke pêkewtiş û krîzan û do seba aştîya herême bixebitîyo.
Badê ke Cagirê Serekê Hukmatê Herêmê Kurdîstanî Qubad Talabanî û Endamê Mektebê Sîyasî yê YNKyî Derbaz Kosret Resûl vizêrî Anqara de Wezîrê Karanê Teberî yê Tirkîya Hakan Fîdanî reyde ameyî têhet, Qubad Talabanî derheqê pêvînayîşî de eşkerayîyêk weşana.
Eşkerayî de wina ame vatene: “Kombîyayîş de ma amadebîyayîşê Herêma Kurdîstanî û YNKyî seba her tewir paştîdayene û serkewtişê prosesê aştîye ard ziwan û ma hêvî kerd ke nê qonaxê neweyî de têkilîyê mabênê Tirkîya û Herêma Kurdistanî xurtêr bikerê ke bi taybetî zî şaristanê Silêmanîye warê bazirganî, sermayegozarî, wendişê berzî û turîzmî de.
Prosesê aştî yê Tirkîya de prosesêko muhîm û tarîxî yo û ma bi bawerîyêka girde û hêvîyêka pîle ewnîyenê ci. Ez kêfweş a ke hukmatê Tirkîya û partîyê ci seba serkewtişê prosesî xebitîyenê. Derheqê rewşa herême de ma helwestê xo yo nêvurîyaye qetî kerd ke ma nêbenê parçeyêke pêkewtiş û krîzan. Derheqê babeta ronayîşê Hukmatê Herêma Kurdîstanî de, ma teyîd kerd ke ganî hetî rewşa newî yê herême, Îraq û Kurdîstanî bigîrê verê çiman û seba ronayîşê hukmatêke newe bilez bikerê. YNK amede yo ke tewrê hukmatêke serê esasê hemparîyêka raste bibo.”
