Serekê Îdareyê Heremî yê Kurdîstanê Federe Nêçîrvan Barzanî, Serekkomarê Îranî Mesûd Pezeşkîyan reyde pêvînayîşêk kerd.
Serekê Îdareyê Heremî yê Kurdîstanê Federe Nêçîrvan Barzanî, seba tewrbîyayîşê merasîmê definkerdişê Rayberê Dînî yê Îranî Elî Xamaneyî ke hêrişanê Îsraîl û DYA (Amerîka) de cuya xo ra bibi, şî Tehran. Nêçîrvan Barzanî, tîya de Serekkomarê Îranî Mesûd Pezeşkîyan reyde pêvînayîş kerd.
Nêçîrvan Barzanî hesabê xo yê X ‘î ser o eşkerayîyêk daye û wina vat: “Ewro serê sibayî Tehran de pêvînayîşê Serekkomar Mesûd Pezeşkîyan reyde ez zaf keyfweş bîya. Ma rayîrê xurtkerdişê têkilîyanê mabênê Herêma Kurdîstanî, Îraq û Îranî erjnayî. Bi taybetî ma hîrakerdişê hemkarîya ekonomîkî ser o erjnayîşî kerdê ke averberdişê têkilîyanê tarîxî, kulturî û cirantîye ke şaranê ma bi serran o yewbînan reyde giredanê.”
Nêçîrvan Barzanî pêvînayîşê xo yê Mesûd Pezeşkîyanî ra ver, wezîrê Karanê Teberî yê Îranî Ebas Erakçî reyde zî ame têhet.
Nêçîrvan Barzanî û Ebas Erakçî, têkilîyanê Îraq û Herêma Kurdîstanî yê Îranî ser o qisey kerd. Ame zanayene ke herdi nameyan seba vindarnayîşê şerê mabênê Îran, DYA û Îsraîlî û babetanê peyênan ê herêmî ser o erjnayîşî kerdî.
Nêçîrvan Barzanî sewbîna Serekê Parlamentoyê Îranî Muhammed Bakir Khalîbafî reyde zî pêvînayîş kerd. Nêçîrvan Barzanî nê pêvînayîşî de, seba caardîşê tam ê peymana Îran û DYA, bal ant muhîmîya dîyalog û têkilîyan ser o.
