Bi rayberîya DBP’yî do Amed de rojanê 4-5ê temmuze de ‘Komxebata Ekonomîya Demokratîke û Rêxistinbîyayîşê Ekonomî’ bêra viraştene. Komîteya Amadekar a komxebate ra Hulya Alokmen derheqê xebate de qisey kerd û wina vat: “Wexto ke ma ewnîyenî Kurdostanî ra, hem hetê cografya ra hem zî hetê xoza ra wayîrê ekonomîyêka zaf zengîn o. Erdê ma zaf zengîn a. La belê gama ke qala kurd û Kurdîstanî bena, no her tim bi xizanîye û bi çînbîyayîşî yeno naskerdene.”
Bi rayberîya Partîya Herêman a Demokratîkan (DBP) do bi sloganê ‘Ekonomîyêka alternatîfe mumkin a’ 4-5ê temmuze de Çand Amed de ‘Komxebata Ekonomîya Demokratîke û Rêxistinbîyayîşê Ekonomî’ bêra organîzekerdene. Na komxebate bi amancê munaqeşakerdişê krîzê ekonomîk û vînayîşê rayîranê alternatîfan virazîyena. Komxebate de hemverê nê probleman de, modelê çareserîye sey ekonomîya komunale, awankerdişê kooperatîfan, piştgîrîya keda cinîyan, pawitişê esnafan û fînansa komelkî sey rayîrê alternatîfî do bêrê munaqeşakerdene. Programo ke do di rojî dewam bikero, roja verêne bi panelan û roja dîyine zî bi xebatanê atolyeyan rayra şêro.
Derheqê komxebate de endama Komîteya Amadekar Hulya Alokmen ajansê ma rê qisey kerd.
‘Modernîteya kapîtalîst tena feydeyê xo fikirîyena’
Hulya Alokmen dîyar kerd ke ekonomî mîyanê cuya merdimîye de wayîrê cayêko zaf muhîm o û wina vat: “Ma eşkenî vajê ke heme tarîxê merdimîye heta ewro, nê persî ser o awan bîyo: Gelo merdimîye do sîstemê xo yê ekonomî senî awan bikero û debara xo senî bikero? Merdimîye bi nê şer û pirodayîşî ameya resayo roja ma ya ewroyîne. Sîstemêko senî û bi çi rengî eşkeno baş bibo? La belê ma zanî ke ewro modernîteya kapîtalîste sîstemêko winasîn o ke hem emperyalîst o, hem zî sey şaran nêfikirîyeno, tena feydeyanê xo fikirîyeno. Wexto ke ma ewnîyenî Kurdîstanî ra, ma vînenî ke hem ekonomîya cografya hem zî ekonomîya xoza, mîyanê xo de wayîrê erdekê zaf zengîn o. La belê gama ke qala kurd û Kurdîstanijan bena, ê her tim bi xizanîye û bi çînbîyayîşî yenê naskerdene.”
‘Mîyanê programî de munaqeşa û sernameyî zaf zêde yê’
Hulya Alokmen qiseykerdişê xo de îfade kerd ke tena kedkarî nê, tena ciwanî nê, ewynê wextî de cinîyî zî wayîrê rolêko taybet ê û nê çîyî vatî: “Cîyakarîya halê cinîyan biney cîya ya; çunke cinîyî bi serran o ke ekonomî ra ameyî dûrvistene û her tim ver xizanîye reyde rî bi rî mendî. No bi xo zî meseleyêka zaf muhîm o. Ma eşkenî qala merdimanê karsazan bikerî yan zî merdimê ke uca de bi şeklêko bîn xebitîyenê. Hetê ekonomî de, sey nimûne, merdimê ma yê Kurdîstanî seba xebatê bi şeklê demkî (mevsîmîmane) şinê welatanê bînan; no bi xo meseleyêk o. Meseleyêka bîne zî turîzm a; merdimê ke teber ra yenê, cografyaya ma de gêrenê. La nê mabênî de, gelo na merdimîye û na xoza rê çi verdenî? Çi çîyêko baş û çi çîyêko xirab peyê xo de verdenî? Ez bawer kena ke wexto no bername ame vînayene, do dîyar bibo ke munaqeşa û sernameyî zaf zêde yê. Seke mi vat, ekonomî cuya merdiman de wayîrê cayêko zaf muhîm o.”
‘Ganî ma bifikirîyê ke ma do komelê xo senî rêxistin bikerî’
Hulya Alokmen ke bal ant prosesê Aştî û Komelê Demokratîkî, da zanayene ke bi serran o serê na erdî de şerêk dewam keno û wina dewam kerd: “Gama ke kurd û Kurdîstanijî waştişê statuyê xo kenî, hetê bînî ra zî gerek seba têkilîyanê rojaneyan û rêxistinbîyayîşê komelî, seba xo rayîrêk bivînî. Seke ame vatene, babeta tewr muhîme ekonomî ya. Ewro mîyanê komelî de çi problemê hetê cinîyan ra bibê, çi yê ciwanan bibê, yanî her qada komelî de, tewr verî meseleya ekonomî vejîyena vernîya ma. Ma sey sernameyê sereke yê xebata înan zî no çî îfade kerd. Sewbîna nê prosesî de, herinda pawitişêkê winasî ke ‘do qanûn, parlamento yan zî hukmat çi gaman bierzo’, ganî ma bifikirîyê ke ma do komelê xo senî rêxistin bikerî û komelî senî bikerî şirîkê na mesela. Tena çend dezgehî nêeşkenê na mesela çareser bikerî; ganî komel pîya, hem seba ameyoxê xo hem zî seba Rojhelatê Miyanênî bibo nimûne, mîyanê na meselade ca bigîro.”
Vengdayîşê tewrbîyayîşê komxebata ekonomî
Sewbîna Hulya Alokmen dîyar kerd ke seba merdimê ke na babete ser o fikrê înan est o yan zî vateyêkê înan est o, roja ewiline ya programî, 4ê aşme, do bi şeklê panelî dest pê bikero û bi nê vatişan qiseykerdişê xo qedêna: “Mîyanê panelî de, waştişê ma no nîyo ke ma bi vateyanê zaf akademîkan mêmananê xo rincan bikerê yan zî bixejilnê. Ma wazenî persanê rojaneyan ê ke ma vînenê, înan munaqeşa bikerî. Roja ewiline panel o; ma şarê xo yê ke wazeno beşdar bibo silaynenê. Roja dîyine zî do hîmanê munaqeşqayan ser o atolyeyî bêrê viraştene. 4 atolyeyê ma est ê. Encam de zî, ma do encamname û qerarê ke ameyî girewtene bi rayîrê çapemenîye şarê xo de bare bikerî.”
