Înîsîyatîfê Yewîya Demokratîke seba serrgêra Qirkerdişê Sêwasî ya 33. eşkererayî daye û vat: “Qirkerdişê Sêwasî rîyê polîtîkayanê yewperestî û redkerdişî qewimîya.”
Înîsîyatîfê Yewîya Demokratîke dîyar kerd ke bi taybetî kurd û elewî; şar û bawerîyê cîya-cîyayî Tirkîya de raştê hêrişê polîtîkayanê yewperest û redkerdişî yenê û vat: “Nê hêrişan ra yew zî 2yê temmuza 1993î de Sêwas de qewimîya û qirkerdişêko gird tarîxî de ame zêdekerdiş. Coka 33 serrî verê cû bi desan şaîr, nuştox û hozanî ke seba Festîvala Pîr Sultan Abdalî ya Kulturî Sêwas de bîyê, bi hawayêko plankerde vernîya çimanê dewlete de otelê Madimakî de ameyê qetilkerdiş.”
‘Bi motîvasyonê vera elewîtîye ame caardene’
Înîsîyatîfê Yewîya Demokratîke da zanayîş ke Qirkerdişê Sêwasî bi motîvasyonê vera elewîtîye ame caardene û wina vat: “Her çiqas ser ra 33 serrî derbas bibê zî adirê Madimakî hema zî hewna nêşîyo. Seba ke tu wext tarîtîya peyê qirkerdişî nêameye roşnkerdiş, kiştoxî nêameyê destbendkerdene û muhakemekerdene û peynî de dewaya nê qirkerdişî bi manaya “vîyartişê demî “ bênetîce ameye verdayene. No netîce; Koçgirî ra heta Dêrsim, Meraşî ra heta Çorum, Gazî ra heta Roboskî dewamkerdişê polîtîkayanê bêcezaverdayîşî yo. Bêguman Sêwas de grûbê faşîstî, helwêstê wezîfedaranê dewlete ra cesaret girewt û dest bi hêrişanê xo kerd. Coka hedefgirewtişê şarê kurdî û elewî her wext polîtîkayê înkar û asîmîlasyonê ser o ameyê awankerdiş.
Eşkeraya ke heta cografyaya zaf kultur û zaf dînî ser o zîhnîyetê yewperestî nêşikîyo do her wext tehlukeyê qetlîaman şaran ser o dewam bikero. Nê semedî ra aştî û komelê demokratîk her wextî ra zêdeyêr lazîmtîyêka heyatî ya.”
‘Adirê Madimakî dewamê Kerbela yo’
Înîsîyatîfê Yewîya Demokratîke eşkerayîya xo de vat ke adiro ke Madimakî de ameyo visnayîş, sey dewamê Kerbela yo, sere de zerrîya şarê elewî, zerrîya heme kesê ke wayîrê wîjdanî yo û wina erjna: “Aşma Muharremî de şarê elewî tena şehîdanê Kerbela yad nêkenê, eynî wextî de Qirkerdişê Sêwasî zî şermezar kenê û 33 kesî ke bi hawayêko wehşî ameyê kiştiş, yad kenê. Bi no hawa, ma zanê ke rojê Muharremî zî Kerbela ra heta Dêrsim heta Sêwas sey têkoşînî estbîyayîşo bêmaben yeno rayraberdiş.
‘Qirkerdiş sucê vera merdimîye yo’
Dewamîya eşkerayî de Înîsîyatîfê Yewîya Demokratîke îfade kerd ke Qirkerdişê Sêwasî sucêko vera merdimîye yo û vat: “La heta nika dewlete sey qirkerdişanê bînan, vera nê qirkerdişî zî ferasetê xo yo fermî nêvurnayo. Coka cayê qetlîam, qirkerdiş û îşkenceyan sey “Cayê vîrî” nênê qebulkerdiş, sey “muzexaneyê vîrardişî” nênê viraştiş. La ma veng danê dewlete ke seba heqê hemwelatîya seyyewbînî ganî Qirkerdişê Sêwasî reyde têrîameyîş bibo û lezabez cayê qirkerdişî bibo muzaxaneyê şermî.”
‘Dejê qirkerdişî nêdanê vîrrakerdiş’
Înîsîyatîfê Yewîya Demokratîke 33 kesê ke ameyê qetilkerdiş yad kerdê û wina vat: “Ma hîsanê xo seba piştîdayîşî şarê xo yê elewî pare kenê. Tirkîya û Kurdîstanî de ganî heme netew, bawerî û mezhebî bêrê qebulkerdiş ke mîyanê şarî de weşvînayîş vila bibo. Ma bawer kenê ke yewîya demokratîk a bawerî û şaran eşkenê vernîya qetlîaman bigêrê, dej û janê nê qetlîaman kêm bikero. Bi amancê ke kiştoxan ra hesab bêro persayîş û têrîameyîşêko rasteqîn bêro caardiş ma do dejê Qirkerdişê Sêwasî wayîr vejîyê û tu car nêdê vîrkerdiş. Bi nê hîsan ma heme kiştoxan û berpirsîyaranê qirkerdişî şermezar kenê û 33 ganî ke ameyê qirkerdiş bi rêzdarî vîr anê.”
