Rayberê MEBYA-DER, TUAY-DER û DEM Partî yê Sêrte bi munasabetê “Mîtîngê Azadîye” yo ke semedê azadîya fîzîkî ya Rayberê Şarê Kurdî Abdullah Ocalanî do meşte Meydanê Îstasyone ya Amedî de bêro viraştene de vengdayîş kerd û vat: “Ma wazenê ke Rayber Apo lezabez bireso azadîya xo ya fîzîkî.”
Bi rayberîya DEM Partî, DBP û TJA do seba azadîya fîzîkî ya Rayberê Şarê Kurdî Abdullah Ocalanî 28ê hezîrane de Amed de bi sloganê “Bi Rayberîya Azad ver bi Azadîye Şinê” mîtîngêk virazîyo. ‘Mîtîngê Azadîye’ yo ke bêro viraştene, do Meydanê Îstasyone ya qezaya Yenîşehîrî ya Amedî de saete 17:00î de bêro viraştene.
Sewbîna Hemsereka DBP’yî Çîgdem Kiliçgun Ûçar û Endamê Sekreteryaya Îmralîyî Veysî Aktaş zî do tewr binê. Deyîrbazî Kadîr Çat, Pinar Aydinlar û Serhado zî do vejîyê sehneyî ser. Şar do ne tena Amed ra, qeza û şaristananê dormeyê Amedî ra zî sey Êlih, Mardîn, Riha, Dêrsim, Çewlîg, Sêrt, Şirnex ra zî tewrê mîtîngî bibo. Rayberanê dezgeyanê demokratîkan ê Sêrte vengdayîşê şarê Sêrte kerd ke tewrê mîtîngî bibê.
‘Mîtîng seba azadîya Rayber Apo û pêro girewteyanê siyasîyan o’
Hemserekê TUAY-DER’î yê Sêrte Mûrat Gogun vengdayîşê şarê Sêrte kerd ke tewrê mîtîngî bibê û vat: “Roşnayîya zindanan, roşnayîya komelî ya. Nê semedî ra 28ê aşme de Meydanê Îstasyone ya Amedî de seba azadîya fîzîkî ya Rayber Apo û pêro girewteyanê ma yê siyasîyan ma yenê têhet. Bêrê ma seba azadîya Rayber Apo û azadîya pêro komelî tewrê mîtîngî bibê. Ma paweyê şarê xo û keyeyanê xo yê, bêrê ma prosesê xo xurt bikerê û aver berê û bi hukmatî gamanan bidê eştene.”
‘Ma pêro pîya azad bibê’
Hemserekê MEBYA-DER’î yê Sêrte Abdûrrahîm Çetîn zî semedê tewrbîyayîşê mîtîngî wina vat: “Ma semedê 28ê hezîranî vengdayîşê pêro şarê xo kenê ke bêrê tewrê mîtîngî bibê. No mîtîng semedê azadîya fîzîkî ya Serekîya û pêro girewteyanê sîyasîyan o û ma her kesî dawetê nê meydanî kenê. No mîtîng eynî wext de azadîya Serekî û neteweyanê Rojhelatê Mîyanênî yo. Bi taybetî zî azadîya neteweya Kurdî ya. Pêro şarê ke Mezopotamya de yê, Rojhelatê Mîyanên û Hîlalê Zêrîn de serê na herre de ciwîyenê do her wext azad bibê. Eke azadîye biba, do azadîya ma hemîna pîya biba. Ma veng danê pêro şarê xo yê welatperwer û wayîrê wîjdanî kenê ke Amed de vengê azadîye berz bikerê.”
‘Ganî ma destê Rayber Apoyî xurt bikerê’
Endamê DEM Partî Abdûllah Epî zî no vengdayîş kerd: “Semedo ke no proses aver şêro û bikewo pratîk, ganî ma her wext mîyanê hewldanan de bê. Ganî ma destê Rayber Apoyî xurt bikerê. Vengdayîşê ma semedê pêro şarê ma yo, 28ê hezîrane de bêrê ma meydan de û mîtîngê azadîye xurt bikerê. Ma wazenê ke Rayber Apo lezabez bireso azadîya xo ya fîzîkî.”
‘Ganî şarê Kurdistanî bêro meydanê mîtîngî’
Endamê DEM Partî Mûstafa Gunduzî zî wina vengdayîşê tewrbîyayîşê mîtîngî kerd: “Tewlî ke di serrî yo Serek Apo prosesêk dabî dest pêkerdene zî, çi heyf ke heta nika dewletê tu gameka şênbere nêeşta. Her roja ke dezgeyê dewletê dimayê xapênayîş û meşgulkerdişî de şinê, nêverdenê ke no proses ser bikewo. Naye ra gere ma destê serekî xurt bikerê û prosesê aştî aver berê. Nê semedî ra 28ê hezîranî de do Amed de ‘mîtîngê azadîye’ bêro viraştiş. Ganî şarê ma yê Kurdîstanî zî uca de bo û destê serekî xurt bikero, coka aştiyêka daîmî virazîyo.”
