Amed – Fermandarîya Cendirmeyan, kiştişê Mehmet Yildirimî, seba birîndarbîyayîşê mulazîmê berzî keyeyê Mehmet Yildirimî rê 270.380 TL tazmînat waşt. Avûkat Mehdî Ozdemîrî seba akerdişê dewa wina vat: “No qerar, nimuneyêko tîpîk ê înfazê bêmehkeme û zirxê huqûqî yo ke xebatkaranê asayîşî paweno.”
Amed de qezaya Licê de dewa Nenyasî de 24ê gulana 2024î de eskerê ke vejiyayê operasyonî, Mehmet Yildirimî (45) kişt ke pîyê 4 gedeyan bi. Yeno vatene ke operasyonî de mulazîmo berz Y.S. birîndar bîyo û dima ra tazmînat waşto. Komîsyonê Tazmînatê Neqdî yê Fermandarîya Pêroyîye ya Cendirmeyan tezmînatanê cîya ke yew 48 henzar û 40 TL, o bîn zî 222 henzar û 340 TL yo û pêro pîya 270.380 TL di textê dewleti ra vejiyayen ra dima bi faîzê ci yo qanûnî keyeyê ey ra bêro girewtene û mesrefê mehkema zî birêziyo peynîya veraveriki. 04. 02. 2026 de dewaya tazmînatî ameya akerdene. Dimayê nê waştişê tazmînatî, ciniya Mehmet Yildirimî Sevîm Yildirim, pîyê ey Yemlîhan û maya ey Zîynet Yildirim ser o dewaya “deynê kesî” ameye akerdene.
Derheqê na babete de avûkatê Mehmet Yildirimi Mehdî Ozdemîrî ajansê ma rê qisey kerd.
‘Hedîse de pêkewtiş çin o, adirîvarnayîşê yew hetî yo’
Mehdî Ozdemîr vat ke mergê Mehmet Yildirimî de, xebitnayîşê hêzê bênisbetî û tezê înfazê bêmehkema rê nimuneyêko tîpîk o û wina domna: “Hedîse de zêdêrê 104 qovanê vengî ameyê vînayîş la çeko ke vanî ê Mehmet Yildirim bîyo, tede tena 2 qovanî vejîyayê. Nê reqamî zî zaf eşkera mojnenê ke hedîseyê ke hêzê asayîşî ci ra vanê “pêkewtiş”, eslê xo de yewbînan rê adirîvarnayîş o. Çarçewaya dewa û wextê herayî de vilabîyayişê zêdêrê 104 qovanan, hem nê gumanî çend xurt keno ke heqê cuye yê Mehmet Yildirimi ameyo binpaykerdene û bizanayîş ameyo kiştene, hem zî mojneno ke cuya sivîlanê ke o ware de ciwiyenê, kewto tehluke.”
‘Mabênê çek û merdeyî de 15 metre mesafe est o!’
Mehdi Ozdemîr vat Mehmet Yildirim ser o 5 guleyî ameyê tespîtkerdene û wina domna: “Mabênê ey û çekê ke vanê ê ey bîyo, 15 metre mesafe est o. Na rewşe mojnena ke na hedîse êdî pawitişê meşruyî vîyarta sey kiştişî ameyo kerdene. Îxbarê mehkema ke ma Serdozgerîya Komare ya Licê rê kerdo, ser ra kêm zêde yew serre vîyarta zî, cipersayîş bi qeydeyêkê bitesir aver nêşono. Na rewşe eşkera kena ke xebatkarê asayîşî herinda ke zere de bibê, wazenî bi zirxê huqûqî bêceza bêrê verdayene.”
‘Dewlete bi cezaya tazmînatî wazena keyeyî di reyî maxdur bikera’
Avûkat Mehdî Ozdemîrî waştişê Fermandarîya Cendirmeyan zî sey “neheqîyêka hera” pênase kerd û vat: “Dewlete, berpirsîyarya xo ya pawitişê cuye ya pozîtîfi nêana ca û bi hewayê hêzê bêtewzîne bena sebebê mergê yew însanî. Na rewşe ra dima zî eynî keyeyî di reyî bi dayîşê cezaya tazmînatî, di reyî maxdurîyetêk virazeno.”
Mehdî Ozdemîrî behsê sîstemetîkbîyayîşê nê tespîtan kerd û peynî de wina vat: “Na hedîse, Tirkîya de keyfîyetê hêzanê asayîşî yê xebitnayîşê çekî û pratîkê bêcezamendişê sîstematîk û herayî rê nimuneyêko giran o. Ma do seba pûçkerdişê nê tespîtê înfazê bêmehkema û seba dewaya mesulan ke bi cigêrayîşêko bitesir bêrê kerdiş, gêrayîşê xo yê heqîqet û edaletî her wext bidomnê.”
