Hemseroka Pêroyî ya DBP’yî Çîgdem Kiliçgun Ûçare kombîyayîşanê şarî yê Elkê û Qilebanî de vist vîrî ke “Meşa Azadîye” ya serra 2024î masaya haştîye nawa ro û va: “Azadîya Serek Abdullah Ocalanî azadîya şarê Kurdî ya.”
Hemsereka Pêroyî ya Partîya Herêmanê Demokratîkan (DBP) Çîgdem Kiliçgun Ûçare û heyeta ke teyra, çarçoveya xebatanê “Ma şari reyde vatena haştîye nanê ro” de, dewa Bêrmanî ya qezaya Elkê ya Şirnexî û dewa Elemûnî ya qezaya Qilebanî ya Şirnexî de tewrê kombîyayîşanê şarî bîyî. Zaf kesî tewrê nê kombîyayîşan bîyî û semedê wextê ewroyî persê xo persayî sîyasetmedaran.
‘Ma destê Rayberê xo xurt bikerê’
Parlementerê DEM Partî yê Şirnexî Mehmet Zekî Îrmezî kombîyayîşê dewa Bêrmanî de qisey kerd û ard ziwan ke hewcebîyayîşê înan bi paştdayîşêko xurt ê şarî esto û wina va: “Ma seba ke wezîyetê wextê ewroyî şarê xo reyde bare bikerê tîya de yê. Ma zaf rey goş na şarê xo ser, çike ma quwetê xo şarê xo ra gênê. Bi vengdayîşê Rayber Ocalanî heta nika zaf gamê girîngî ameyî eştene û ewro seba ke haştîyêka bi rûmet bêro ca, şarê ma amade yo. Ma wazenê xaka xo de azad û seyyewbinî bicuyê, seba ney zî ganî dewlete zî vera gamanê ma gaman bierzo. Ganî ma destê Rayberîya xo xurt bikerime ke asta muzakereyan de waştenanê ma bêrê qebûlkerdene. Ney ser ra zî hewcebîyayîşê ma bi yewîti û quwetê şarê ma est a. Dewlete neçara ke seba averşîyayîşê wextî gamanê hiqûqîyan bierzo.”
‘Bawerîya Raybertî bi şarî esta ke gaman bido eştene’
Hemsereka Pêroyî ya DBP’yî Çîgdem Kiliçgun Ûçare kombîyayîşê dewa Bêrmanî de dîyar kerd ke sîyasatê Tirkîya heta ewro sîyasatê xapnayîşî bîyo û wina va: “Sîyasatê Tirkîya de yew qise esta, vanê ‘çareserkerdîşê meseleya Kurdî Amed ra derbas bena.’ Na qiseye sey sîyaset heta ewro ameya vatene. Labelê ewro masa ameya ronayîş û na masa bi keda Rayber Abdullah Ocalanî, bi keda şarê ma ameya ronayîş. Eke bawerîya Raberîya ma bi cinî, ciwan û şarî çinêbîyêne, na gama pîle nêeştêne. Ewro ra tepîya qet wextê ma çinîyo ke ma babokê pergalî bimanim. Ma eke nê prosesî goreyê zerîya xo aver bibime o waxt Kurdîstano zê behişt, cuyêka behişte vernîya ma de ya.”
‘Bîrdozîya cinîyanê Kurdan do wextî bi haştîye tacîdar bikero’
Çîgdem Kiliçgun Ûçare dewamê qiseykerdîşê xo de da zanayene ke ê wazenê şar zî seba haştîye qiseya xo vajo û wina dewam kerd: “Ma wazenê şarê ma yo ke na raye ra keda xo daya, qiseya xo vajo. Çike ma nêeşkenê meseleya Kurdî biverdim destanê dewlet û hukmatî. Ma bi xo ganî meseleya xo çareser bikerê û paweyê kesî nêmanê. Ewro bîrdozîya cinîya Kurde temamê dinya de ca bîya û quwetê cinîya Kurde do ewro roj bi haştîye tacîdar bikero. Şarê Kurd tewrê tarîxî de rayêka zaf derge ramita û nameyêke nê şarî est o. Dinya de şarê Kurd bi rayîrşîyayişê azadîye û demokrasîye yeno şinasnayene. Ewro nê tekoşînî masa nawa ro û serê na masa de Rayber Ocalan esto.”
Çîgdem Kiliçgun Ûçare kombîyayîşê dewa Elemûnî de zî seba azadîya Rayberê Şarê Kurdî Abdullah Ocalanî va ke azadîya şarê Kurdî Îmralî de ameya tecrîdkerdene û wina qisey kerd: “Rayber Apo estbîyayîşê şarê Kurdî yo û dewleta Tirkîya ney zanena. Naye ser o ke Rayber Ocalan nêzdîyê 27 serran o zîndan de mîyanê tecrîdî de tepîşîyeno. Dewlete hol zanena bîrdozîya Rayberî Rojava û Rojhilat de vîyartbarîye de ya. Seba ney ma vanê azadîya Rayberî azadîya şarê Kurdî ya.”
Vengdayîşê tewrbîyayîşê mîtîngî
Çîgdem Kiliçgun Ûçare peynîya qiseykerdişê xo de venga beşdarbîyayîşê mîtîngê azadîya Ocalanî kerd û qiseykerdîşê xo wena qedêna: “Tewr peyên ma venga şarê xo kenê ke seba azadîya Rayber Ocalanî û azadîya şarê Kurdî tewrê mîtîngê 28ê hezîrane yo ke Amed de yeno viraştiş bibê.”
Şarê dewan: Rayberê Şarê Kurdî do haştîye bîyaro
Welatîyê ke tewrê kombîyayîşan bîyî, seba wextê ewroyî nê waştenê xo ardî ziwan û vatî ke bawerîya înan bi Rayberê Şarê Kurdî Abdullah Ocalanî esta ke do haştîye bîyaro nê welatî. Welatîyan dîyar kerd ke dewlete û AKP seba gam eştene zaf qels manenê û ganî dewlete seba azadîya Rayberê Şarê Kurdî Abdullah Ocalanî lez û bez gaman bierzê.
Çîgdem Kiliçgun Ûçare û heyeta ke teyra do merkezê Qilebanî û merkezê Şirnexî de zî tewrê kombîyayîşanê şari bibê.
