TJA’yî bi beyanatêk startê kampanyayî da û vat: “Ma cinîyê TJA^yî venga heme şaranê Tirkîya, sere de cinî û raya pêroyî ya demokratîke kenê ke bi fikir, zerrî û çalakîyanê xo tewrê gama ke ma daya dest pêkerdene, bibê. Seba ke no proses bivûrîyo zemînêko ke ma pîya deskewteyanê pîlan û azadîye bi destfînê.”
Hereketê Cinîyanê Azadan (TJA) kampanyaya “Ma seba azadîya Raybertî, seba kultur û ziwanê kurdî û verba şîdetê cinîyan têkoşîn danê’ daye dest pêkerdene.
Amed
Amed de Komela Çand û Hunerî ya Dîcle de beyanat ame dayene û aktîvîstê TJA’yî û zaf cinîyî tewrê beyanatî bîyî. Metnê kurdkî Hemsereka DBP’yî ya Amedî Sultan Yaray, metnê tirkî zî Hemsereka TUAY-DER’î ya Amedî Yeter Erel Tuma wend.
‘Têkoşîn tewr nêzdîyê destkewteyan o’
Beyanatî de ame dîyarkerdene ke Rojhelato Mîyanên reyna bîyo merkezê Şerê Dinya yê 3. û uca de dewletê nêrperestî û sermayedarê ke ey îdare kenê qirkerdiş, înkar û îmha kenê. Beyanatî de ame vatene: “Her çiqas zemînê nakokîyan tewr xorîn yê medenîyetê dewlete aseno zî, nêro vîrkerdiş ke Rojhelatê Mîyanênî de welatê modelanê ciwîyayîş û têkoşînê azadîye û seypêyîye yo. No esasê heqîqetî yo ke ma vînenê, zanê û ciwîyenê ke bi kulturê cinîya azade, pluralîst û momentê tewr nêzdîyê azadîye xo de hewêneno. Coka no têkoşîno ke her di medenîyetî dayê pêro tewr nêzdîyê destkewte yo.”
‘Eşkera yo ke sebebê feqîrîya cinîyan modernîteya kapîtalîst o’
Beyanat de ame dîyarkerdene ke hetêk yê têkoşînî dewletê neteweyî yê ke îdeolojîyê dînperestîye, netewperestîye, zanistperestîye û cinsperestîye reyde kenê hemê krîzanê komelkî, ekonomîkî, sîyasî û kulturî yê. Beyanat de wina ame vatene: “Eşkera yo ke polîtîkayê ke cinîyan qetil kenê, her keye kenê sîstemêkê hepisxane, îstîsmarê domanan û qetlîamî sistemîk kenê û bi nameyê azadîye cinîyan îstîsmar kenê, emegê înan bêqîmet kenê, kenê meta û feqîrîya cinîyan xorîn kenê, pêro eynî çime ra, modernîteya kapîtalîste ra vejîyenê. Ameyo dîyene ke averşîyayîşê peyênê Surîye de zî heta ke zîhnîyetê dewleta neteweyî ya yewperest ya modernîteya kapîtalîste nêro vîyartene tu çareserîyêko daîmî nêbeno.”
Hedef û hemleyê ke deklarasyonî de ameyî parekerdene wina yê:
-Bingeyê caardişê şertanê xebat û cuya azade yê Birêz Ocalanî de heta tecrîdî bişiknê ma do hemleya xo bîyarê ca.
-Nê prosesê pêvînayîşanê Îmraliyî de ma do perspektîfanê Birêz Abdullah Ocalanî xo rê sey mesuldarîyêke bivînê û goreyê net têkoşîn bikerê.
-Seba çareserîya meseleyê kurdî û bi qanûnan pawitişê heqanê kurdan ma do têkoşîn bikerê.
-Ma do bingeyê perspektîfê cinîya azade ya Abdullah Ocalanî de xo têkoşîn bikerê.
-Ma do vera polîtîkayanê asîmîlasyonî yê serê kultur û ziwanê kurdan têkoşîn bikerê.
-Ma do vera polîtîkayanê şerê taybetî cinî û ciwanan bipawê.
-Ma do bingeyê tezanê azadîya cinîyan ê Birêz Ocalanî de hişmendîya xopawitişî û antî-cînsîyetperestîye bîyarê ca.
-Hemleya ma heta caardişê azadîya Birêz Ocalanî do dewam bikera.
Ma venga pêro cinîyan danê ke bi sloganê ‘Jin, Jiyan, Azadî’ bi fikr, zerrî û çalakîya xo tewrê na hemle bibê.’’
