Torra Heqanê Merdiman a Kurdîstanî eşkera kerd ke Kamyaran û Bokan de 3 kurdî hetê hêzanê Îtlaatê Îranî ra ameyî destbendkerdene û aqûbetê înan dîyar nîyo.
Torra Heqanê Merdiman a Kurdîstanî derheqê destbendkerdişê welatîyanê kurdan ke hetê hêzanê rejîmê Îranî ra ameyo kerdene, zanayîşî pare kerdî.
Gorê xebera RojNewsî ya ke paştî dana zanayîşanê Torre; 12ê hezîrane de hêzê ke girêdayeyê Îtlaatê Îranî yê, bê qerarê mehkema eşto keyeyê her di birayanê bi nameyê Serdar Rehman û İhsan Rehmanî ke Kamyaran de ciwîyenê. Goreyê agahîyan hêzan keye de gêrayîş kerd, dest dayo telefonanê înan ser o û înan ra vato ke wa şêrê zîyaretê merkezê polîsan ê Kamyaranî. Ameyo dîyarkerdene ke dima ke her di birayî şîyî merkezê polîsan, o wext ra nat qet yew agahî înan nêyena girewtene.
Gorê eynî zanayîşan, her di birayî serra 2025î de zî seba ke tewrê şayîya Newroze bîbî û sembolê Kurdkî şuxulnaybî, hêzanê rejîmî vengdabi înan û çend saetî destbendkerde mendbî.
Sewbîna Torra Heqanê Merdiman dîyar kerd ke 13ê hezîrane de zî hêzanê Îtlaatê Îranî bê destûrêko qanûnî eşto keyeyê mamostayê teqawitbîyaye Yusuf Emînî yo ko taxa Elîawa ya sûka Bokanî de ciwîyeno û o destbend kerdo.
Ame dîyarkerdene ke Yusuf Emînî verê cû zî seba ke şahîyêk de kincê Kurdkî dayê xo ra, çend welatîyan reyde amebi destbendkerdene û dimayê îfadeyî amebi veradayene.
