Hemwelatîyê Amedî yê ke prosesê “Aştî û Komelê Demokratîkî” erjna, diyar kerd ke heta Rayberê Şarê Kurdî Abdullah Ocalan azad nêbo ê do prosesî ra bawer nêkerê û înan waşt ke qanûnî bêrê viraştiş.
Munaqeşeyê seba prosesê “Aştî û Komelê Demokratîkî” ke Rayberê Şarê Kurdî Abdullah Ocalan 27ê sibata 2025î de dabî destpêkerdiş, sey rojevo sereke yê vakurê Kurdîstanî û Tirkîya dewam kenê. Rixmo ke Rayberê Şarê Kurdî Abdullah Ocalan û Têkoşînê Azadîya Kurdistanî seba çareserî gamê tarîxî eştê zî, hema dewleta Tirkîya vera nê gaman de tu gamî nêeştê, eksê naye berpirsîyarîya xo nêarda ca. Nê gaman ra tewr muhîm zî statuyê huqûqî yê sermuzekkerekerdoxê prosesî Rayberê Şarê Kurdî Abdullah Ocalanî yo. Nêeştişê gaman ê dewleta Tirkîya beno sebebê munaqeşeyanê xetimîyayîşê prosesî û bawerîya komelî ya vera prosesî kêm keno.
Hemwelatîyê Amedî derheqê prosesê “Aştî û Komelê Demokratîkî” û azadîya fîzîkî ya Rayberê Şarê Kurdî Abdullah Ocalanî de qisey kerd.
‘Ganî Serek Apo azad bo’
Hemwelatîyê Amedî vîr vist ke rixmo ke PKK’yî xo fesih kerd, adirbest îlan kerd, hêzê xo Vakur û Tirkîya ra antî zî dewleta tirkan heta nika yew qanûn nêveto. Hemwelatîyan îfade kerd ke dewlete wazena Qendîl veng bikera û nê çîyî vatî: “PKK û Serek Apo zaf gamê birûmetî eştî. Ma Serek Apo ra zaf bawer kenê la ma dewleta tirkan ra bawer nêkenê. Çend serrî verê cû ganî Serek Apo azad bibîyêne. Devlet Bahçelî vat, ‘Wa bêro meclîs de qisey bikero.’ Heta Serek Apo azad nêbo, ma tu wext prosesê aştî ra bawer nêkenê. Ganî Serek Apo azad bo, gereka Tirkîya qanûnan de ziwanê şarê kurdî, heqanê şarê kurdî, eyaletê Kurdîstanî, federalîzmê Kurdîstanî qebul bikera.”
‘Wa heqê kurdan ê heqîqetî bidê ci’
Amedijan vat ke ganî dewleta Tirkîya gamanê rastan bierza û wina vat: “Prosesê aştî kurdan ra dest pê nêkeno. Prosesê aştî hukmatî ra dest pêkeno. Hukmat heqanê Kurdan bi şeklêke rast bido înan, o wext beno prosesê aştî.” Amedijan diyar kerd ke seba ke proses aver şêro ganî ewil girewteyî bêrê veradayîş û vat: “Eke waştişo bingeyin no yo, o wext heme girewteyan serbest veradê. Selahattîn Demîrtaş û ê bînan veradê wa o zî siyasetê xo bikero. Ma wazenê ke îqtîdar karê xo bikero û gaman bierzo.”
