Dr. Fadîl Bedîrhanoglûyî derheqê Konferansê ‘Seserra Dîyine de Konferansê Ravurîyayîşê Komara Demokratîk’ de dîyar kerd ke pêro beşê komelî do tewrê konferansî bibê û vat: “Ma hêvî kenî ke no konferans bibo lîngêko xurt ê nê prosesî. Wa her kes wayîrê prosesî vejîyo.”
Bi vangdayîşê xeylê sîyasetmedar, roşnvîr, hunermend û akademîsyenan, 13-14ê hezîrane de Stenbol de no konferans do bêro kerdiş. Konferans do Merkezê Kulturî yê Cem Karaca yê Bakirkoyî de bêro kerdiş. Dr. Fadîl Bedîrhanoglûyî derheqê babete de qisey kerd û dîyar kerd ke Komara Tirkîya çinhesibnayîşê şar û bawerîyan ameya awankerdene, nê polîtîkayan zî seserrî yo bêçaretî û koçberîye ra teber tu çîyêk nêdayo şaran. Fadil Bedîrhanoglûyî vat ke prosesêko newe dest pêkerdo û ganî hemwelatîyî zî seba nê prosesî bêveng nêmanê, wa zor bidê dewlete ke gaman bierzzê.
‘Heme beşê komelî do beşdarê konferansî bibê
Dr. Fadil Bedîrhanoglûyî dîyar kerd ke seba seserra newa wa sey seserra verênî nêba, lazimtîya înan bi konferansêkê winasîne bîye û wina dewam kerd: “Sey kesayetanê sivîlan ma qerar girewt ke Stenbol de konferansêk virazî. Ma wazenî pêro beşê komelî tewrê nê konferansî bibê û nê vurnayîşî pîya bikerî. Taybetmendîya nê konferansî a ya ke binê sîya tu partîyanê sîyasîyan de nîya, bi temamî sivîl a. Pêro beşê Kurdîstan û Tirkîya do tede ca bîgîrî.”
‘Ma do heme partîyanê sîyasîyan silaynê konfernasî’
Fadil Bedîrhanoglûyî vat ke ê do partîyanê sîyasîyan zî dawetê konferansî bikerî û nê çîyî vatî: “Waştişê ma o yo ke partîyê ke seserra verênî ra razî nêbîyî, bêrê beşdarê nê konferansî bibê û seba seserra newa vatişanê xo vajê. Hêvîya ma a ya ke pêro partîyê ke wazenî Tirkîya nê krîzî ra vejîya, bêrê beşdarê konferansî bibê.”
‘Dewlete astê yew neteweyî ra vejeya ameya asta yewmerdimî’
Fadil Bedîrhanoglûyî îfade kerd ke Tirkîya de problemêko pîl ê demokrasî esto û wina vat: “Dewleta ke serekkomarê ci qanûnê bingeyinî qebul nêkeno û qeraranê mehkemeyan nêano ca, binkewtişê nê sîstemî eşkera keno. Dewlet easta yew neteweyî ra vejîyaya, ameye asta yewcmerdimî. Krîzêko pîl est o û no zî encamê nê nîjadperestîye yo. Ma eşkenî demokrasîye reyde pîya bîcîwîyê. Kurdî sey kurd, tirkî sey tirk, wa pêro neteweyî bi nasnameyê xo bîcîwîyê.”
‘Hêviya me a ya ke konferans bibo lingêkê xurt ê prosesî’
Fadîl Bedîrhanoglûyî da zanayene ke ê wazenî no konferans bibo destpêkê vengberzkerdişê vera neheqîye û qiseykerdişê xo wina domna: “Zilm kamca de bibo, ganî her kes vengê xo berz bikero. Ma hêvî kenî ke konferans bibo lîngêko xurt ê nê prosesî û her kes waştişanê xo bîwazo. Eke Tirkîya de demokrasî awan bibo, do seba Rojhelatê Mîyanênî zî bibo nimûne. Bedilîyayîş zî destê ma de yo.”
